АКШнын мамлекеттик катчысынын Түштүк жана Борбор Азия боюнча жардамчысы Роберт Блейк 17-январда Кошмо Штаттары менен Кыргыз Республикасынын ортосундагы жыл сайын өтүүчү эки тараптуу кеңешмеге катышкан соң Кыргызстандын тышкы иштер министринин орун басары Эрнест Оторбаев менен чогуу журналисттердин суроолоруна жооп берди.
Роберт Блейк “Манастагы” жүк ташуучу борбордун тагдыры, Кыргызстан жана АКШ ортосундагы экономикалык байланыш жана этностор аралык мамилелер тууралуу сөз сүйлөдү.
“Мен кыргыз бийлигин 2010-жылы болгон июнь коогалаңынан кийинки кырдаалды жакшыртуу боюнча активдүү иштөөгө чакырам. Кыргызстандын улуттар аралык мамилелер боюнча компонентти Улуттук стратегияга кошкону өтө кубандырат”, - деди Блейк.
“1992-жылдан тарта АКШ Кыргызстанга 1,3 миллиард доллар жардам иретинде берген. Бул “Манас” аэропортунда жайгашкан жүк ташуучу транзиттик борборду кошпогондогу сумма. Былтыркы жылдын эсебинен Америка Кыргызстанга жардам иретинде 40 миллиондой доллар берди. “Манасттагы” транзиттик борбор өзүнчө 200 миллион доллар төлөдү”, - деп баса белгиледи Блейк.
Кечээ Роберт Блейк Кыргызстандын президенти, премьер-министри жана вице-премьер-министри менен жолугушкан. Президент Алмазбек Атамбаев жолугушуу учурунда антитеррордук күчтөрдүн транзиттик борбору тууралуу келишим 2014-жылы аягына чыгарын дагы бир жолу эскертип, “макулдашуунун мөөнөтү аяктаган соң, «Манас» аэропортунда аскерге тиешелүү эч нерсе калууга тийиш эмес”, - деп билдирген.
Бүгүн Роберт Блейк “Атамбаевдин “Манас” аэропортунда транспорттук түйүн түзүү сунушун түшүнүү менен кабыл алабыз” деп жарыялады.
“Учурда “Манаста” жайгашкан транзиттик борбордун тагдыры тууралуу сүйлөшүүлөр дагы деле уланууда. Бирок алдын ала божомолдорду же аягына чыга элек сүйлөшүүлөр тууралуу сөздөрдү айтуудан алысмын”.
“Азаттык” үналгысынын кабарчысы Роберт Блейк мырзага “АКШ Борбор Азиядагы башка өлкөлөрдүн территориясынан “Манастагы” транзиттик борборго альтернатива издейби?” деген суроону узатты.
“Өткөн аптада президенттер Барак Обама жана Хамид Карзай жолугушту. Алар эки тараптуу коопсуздук боюнча макулдашууну талкуулашты. Ал макулдашуу боюнча Ооганстанда канча америкалык жоокер калаары такталууда. Макулдашууга кол коюлганда, Ооганстандагы жана башка өлкөлөрдөгү объекттер боюнча суроого жооп берсе болот”, - деп жыйынтыктады Роберт Блейк.
Ушуну менен АКШнын мамлекеттик катчысынын Түштүк жана Борбор Азия боюнча жардамчысы Роберт Блейктин Кыргызстандагы иш сапары аягына чыкты.
Азаттык+ телепрограммасынын алып баруучусу, продюсери (2005-2009), Москвадагы кабарчысы (2011). 2012-жылы "Москвада калган ый" даректүү тасмасы "Бир дүйнө" кинофестивалында "Ачылыш" наамына татыган. Бишкек гуманитардык университетинин журналистика бөлүмүн 2005-жылы аяктаган.
