Киев мэрі Виталий Кличко Ресей әскері 16 сәуірге қараған түні Киевтің бірнеше ауданын атқылағанын хабарлады. Жараланғандар мен қаза болғандар туралы мәлімет жоқ. Қала мэрінің айтуынша, атқылауға ұшыраған аудандарда құтқарушылар мен дәрігерлер жұмыс істеп жатыр.
Зеленский: 24 ақпаннан бері 3 мың украин жауынгері опат болды
Украина президенті Владимир Зеленский CNN арнасына берген сұхбатында Ресей басқыншылығы басталғалы бері қанша украин сарбазының қаза болғанын айтты. Оның сөзіне қарағанда, 24 ақпаннан бері шамамен үш мың украин әскери қызметкері опат болған, он мыңы жараланған. Қаншасы "аман қалатынын айту қиын" деді ол.
Тараптар адам шығыны туралы сирек айтады. Ресей қорғаныс министрлігі наурызда 1,5 мың солдатынан айырылғанын мәлімдеген. Ал Украина жағы Ресейдің 20 мың солдаты мерт болды деген.
АҚШ барлау қызметінің наурыз ортасындағы есебінше, Ресейдің 8-14 мың солдаты соғыста өлген.
Пентагон: Ресейлік "Москва" крейсерін украиналық зымырандар батырған
Ресей теңіз әскерінің флагманы саналатын "Москва" ракеталық крейсеріне 14 сәуірде екі украиналық зымыран түскеннен кейін кеме батып кетті. Жұма күні аты-жөнін айтпаған АҚШ-тың жоғары лауазымды өкілі осылай деп мәлімдеді. Оның сөзінен агенттіктер үзінді келтірді.
АҚШ өкілінің сөзіне қарағанда, крейсерге кемеге қарсы "Нептун" зымыранымен шабуыл жасалған болуы мүмкін. Вашингтондағылар зымыран соққысы мен кеме батқаннан кейін адам шығыны болғанына сенімді, бірақ қанша теңізші батып кеткенін айта алмады.
Осылайша Вашингтон Украина ресми тұлғаларының крейсер жөнінде мәлімдемелерін растады.
"Москва" кемесіне зымыранмен соққы жасағанын Украина тарабы 13 сәуірде мәлімдеген. 14 сәуірге қараған түні Ресей қорғаныс министрлігі кемеде өрт болғанын растады. 14 сәуірде күндіз Пентогон да, Ресей де крейсердің теңіз бетінде екенін хабарлаған. Бірақ бірнеше сағаттан соң Ресей қорғаныс министрлігі кеме теңіздегі дауылдан тепе-теңдік сақтай алмай, батып кетті деп мәлімдеді. Мәскеу өрттін неден шыққанын айтпады.
Ресей қорғаныс министрлігі бірнеше жүз адамнан құралған кеме экипажы басқа кемеге эвакуацияланғанын хабарлады. Жұма күні дереккөзге сүйенген ТАСС агенттігі "Москва" теңізшілері Севастопольге жеткізілді деп мәлімдеді. Алайда оған дәлел болатын фото, видеолар жариялаған жоқ.
БҰҰ: Соғыс басталғалы бері Украинадан 5 миллионнан астам адам босып кеткен
Ресей соғыс ашқалы бері бес миллионнан астам адам Украинадан босып кеткен. Бұл Екінші дүниежүзілік соғыс кезеңінен бергі Еуропадағы ең ірі миграциялық дағдарыс, деп жазды БҰҰ дерегіне сүйенген AFP агенттігі.
Босқындардың басым бөлігі яғни, шамамен үш миллион адамды Польша қабылдаған. Украинаның өз ішінде жеті миллион адам басқа өңірге көшуге мәжбүр болған.
Украинадағы балалардың үштен екісі жақындарымен бірге үйлерін тастап кеткен. Олардың бір бөлігі елден кетсе, бір бөлігі басқа өңірге қоныс аударған.
Украинадан Ресей аумағына 400 мыңнан астам адам кірген.
БҰҰ дерегінше, елде босып кеткендер көбеюімен қатар Украинаға оралып жатқандар да бар. Халықаралық ұйым мәліметінше, 870 мың адам еліне оралған.
Осыған дейін БҰҰ 24 ақпаннан бері Украинаның 2 мыңға жуық бейбіт тұрғыны қаза болғанын, 150-і бала екенін мәлімдеген. Бұл көрсеткіш көп болуы да ықтимал, себебі шайқас қызу жүріп жатқан аймақтардан ақпарат кешігіп жетеді.
ПІКІРЛЕР