Харьков облысында бейбіт азаматтар мінген автобус атқыланды, қаза тапқандар бар
Бейсенбі, 15 сәуір күні Харьков облысы Боровая ауылының түбінде бейбіт азаматтар мінген автобус атқыланып, 7 адам қаза тапты, 27 адам жарақат алды. Бұл туралы облыс прокуратурасына сілтей отырып "Суспільне" порталы хабарлады.
Бұл ақпарат әлі өзге дереккөздер арқылы растала қойған жоқ. Боровая Ресей күштерінің бақылауында.
Ресей федералды қызметі сарбаздарды жерлеуге және белгі тас қоюға бөлінген ақшаны 17 пайызға ұлғайтуды сұрады. Бұған BBC-дің Орыс қызметі назар аударды. Бірақ бөлінген қаражаттың жалпы сомасы айтылмады.
Ресей қорғаныс министрлігі соғыста қаза тапқан сарбаздары жөніндегі ақпаратты соңғы рет 25 наурызда ғана жариялаған. Ол кезде Мәскеу 1351 сарбазының қаза тапқанын растаған. Украина билігі қаза тапқан орыс сарбаздары бұдан едәуір көп дейді. 14 сәуір күнгі баспасөз хабарламасында Украина күштері соғыс кезінде мерт болған орыс сарбаздарының саны 20 мыңнан асты деп мәлімдеді.
Соғыс уақытында мұндай ақпаратты тәуелсіз дереккөздер арқылы тексеру қиын.
Украинадағы жағдайға сілтеген Германия экономика министрі Роберт Хабек халқын энергетиканы үнемдеп пайдалануға шақырды. Бұл туралы Spiegel хабарлады.
"Бәріңізді энергия үнемдеуге үлес қосуға шақырамын. Мұны бәріміз қатысатын ортақ жоба ретінде қарастырсақ қана Ресей импортына деген тәуелдігімізді азайтамыз" деді Хабек.
Министр тіпті бір-екі кеңесін де айтты. Мәселен, ол компания қызметкерлеріне аптаның кей күндерінде үйден істеуді, мүмкін болған жерде жеке көліктің орнына велосипед пен пойызды пайдалануды ұсынды.
Хабектің сөзінше, үй жылытқанда терезені пердемен жауып қойса, электр энергиясын 5 пайызға үнемдеуге, үйдегі температураны 1 градусқа төмендетсе, электр энергиясын 6 пайызға үнемдеуге болады.
Энергия және таза ауаны зерттеу орталығының (CREA) мәліметінше, Ресей Украинаға басып кіргелі Еуроодақ Ресей көміріне, мұнайы мен газына 33 миллиард евро төлеген.
Польша Ресей көмірін импорттауға эмбарго жариялады. Варшава бұл қадамға жекедара барды, Еуроодақтың ортақ шешімін күтпеуді құп көрді. Польша президенті Анджей Дуда эмбарго туралы заңға қол қойды.
Еуроодақ Украинаға басып кірген Ресейдің энергия көздерінен бас тарту мәселесін әлі де қарастырып жатыр.
ПІКІРЛЕР