Ұшақ апаты қаңтардың 16-сы күні таңертең болған. Түрік әуе компаниясының Гонконгтен Стамбулға бара жатқан "Боинг-747" жүк ұшағы Қырғызстанның Шу облысында орналасқан Манас әуежайының қонатын жолағына жете алмай, сол маңдағы Дача-Суу саяжайы үйлерінің үстіне құлаған. Алдын ала тараған мәліметтерге қарағанда, ұшақ 20 шақты үйді басып қалған.
Ұшақ құлаған саяжайдан түсірілген суреттер:
Қырғызстандағы ұшақ апаты
Азаттықтың Қырғыз қызметінің ақпаратына қарағанда, 32 адам қаза тапқан. Олардың көбі - саяжай тұрғындары. Мерт болғандар арасында балалар да бар. Бұл ақпаратты Азаттыққа Қырғызстанның төтенше жағдайлар министрі Кубатбек Боронов айтты.
- Жиыны 32 адам қаза болды. Оның 28-і - біздің (Қырғызстанның - ред.) азаматтар, төртеуі - ұшақ экипажының мүшелері,- деді Боронов.
Министр құрбандар саны көбеюі мүмкін екенін ескертті. Опат болғандар мен жараланғандар жайындағы мәлімет әлі де нақтыланып жатыр.
Ал Бішкек қаласының жедел жәрдем станциясы бас дәрігерінің орынбасары Егор Борисов Азаттық тілшілеріне «жарақат алған алты адамға жедел медициналық жәрдем көрсетіліп жатқанын, оқиға орнына бірнеше реанимациялық көлік барғанын» айтқан.
Апат орнынан түсірілген видео:
Қазір әуежай уақытша жабылған. Оқиға орнында ықшам штаб құрылып, құтқару және өрт сөндіру жұмыстары жалғасып жатыр.
"АПАТ СЕБЕБІ БЕЛГІСІЗ"
Әзірге жүк ұшағының неден құлағаны белгісіз. Бұл туралы Азаттықтың Қырғыз қызметі тілшісіне халықаралық "Манас" әуежайының баспасөз хатшысы Әлия Құрбанова мәлімдеді.
- Ұшаққа қалың тұман кесірін тигізуі мүмкін, бірақ біз әзірге анық ештеңе айта алмаймыз. Анық ақпарат болса, кейінірек хабарлаймыз, - деді ол.
Әлия Құрбанова құлаған ұшақтың Гонконгтен Стамбулға ұшып бара жатқанын растады. Оның сөзіне қарағанда, ұшақ жанармай толтыруға қонбақ болған.
Азаттықтың Қырғыз қызметі жариялаған видео: