ТЖМ: Маңғыстауда құлаған жолаушы ұшағында 69 адам болған
Azerbaijan Airlines әуе компаниясы Қазақстанның Маңғыстау облысында құлаған ұшағында болған жолаушылар тізімін жариялады, онда 62 адамның аты-жөні жазылған.
Қазақстанның төтенше жағдай министрлігі кейінгі жариялаған мәліметінде апатқа ұшыраған Embraer Е-190 ұшағында барлығы 69 адам болған деп хабарлады. Мұндай деректі ТЖМ Қайрат Жанаспаев айтты.
Бұған дейін Azerbaijan Airlines компаниясы ұшақта 62 жолаушы мен экипаждың бес мүшесі болған деген ақпарат таратқан еді.
Қазақстан үкіметі Ақтау маңында құлаған ұшақ апатының себебін зерттейтін комиссия құрды. Оның құрамында премьер-министрдің орынбасары, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, бас көлік прокуроры бар.
Қазақстанның төтенше жағдай министрлігінің кейінгі мәліметі бойынша, Ақтау маңына құлаған әзербайжандық жолаушы ұшақта болған 28 адам аман қалған, екеуі – бала. Қазақстан президенті Қасым-Жомарт Тоқаев зардап шеккендерге тиісті көмек көрсетуге Ақтауға Астанадан дәрігерлер жіберуді тапсырды.
Маңғыстау облыстық денсаулық сақтау басқармасы Ақтаудағы облыстық көпбейінді ауруханаға ұшақ апатынан зардап шеккен 26 адам түсті деп хабарлады. 7 адамның жағдайы ауыр, олар жансақтау бөліміне жатқызылған. Облыстық балалар ауруханасына 11 және 16 жастағы 2 бала түскен. Ұшақ құлаған жерден қаза болған 4 адам табылған.
Ақтаудағы жергілікті пабликтерде жұртты ұшақ апатынан зардап шеккендерге қажет қан тапсыруға үндеген жазбалар тарап жатыр. Желіде тараған бірқатар фотоларда Ақтаудағы қан тапсыратын орындарда кезекте тұрған адамдар байқалады.
ПІКІРЛЕР