Қырғызстанда аяқталған Дүниежүзілік көшпенділер ойынында жалпыкомандалық есеп нәтижесі бойынша Қазақстан мен Қырғызстан арасында дау шықты. 6 қыркүйекте жанкүйерлер арасында пікірталас туындаған тұста Қырғызстан спорт және дене шынықтыру агенттігі жалпыкомандалық есеп жүргізілмейді деп жариялаған. Ал 7 қыркүйекте Қырғызстан президенті Садыр Жапаровтың баспасөз хатшысы "медаль есебінде Қазақстан жеңді" деп жариялады. Көшпенділер ойынындағы даудың анық-қанығы.
ЕКІ ТҮРЛІ КЕСТЕ
Көшпенділер ойыны аяқталған соң қазақстандық пабликтер жариялаған жалпыкомандалық есепте Қазақстан 32 алтын, 20 күміс, 22 қоламен (барлығы 74 медаль) бірінші орында, Қырғызстан 30 алтын, 35 күміс, 19 қола медальмен (барлығы 84 медаль) екінші орында тұрды.
Бұл кесте қазақстандық интернет сегментінде тарап кеткен тұста Көшпенділер ойынын ұйымдастырушылар инстаграмдағы ресми парақшаларында Қырғызстан бірінші орында тұрған жалпыкомандалық есепті жариялады. Ұйымдастыру комитетінің кестесіне сай, Қырғызстанда 30 алтын, 29 күміс, 13 қола (72 медаль), ал Қазақстанда 29 алтын, 16 күміс, 19 қола (64 медаль) деп көрсетілген. Артынша бұл нәтижені ұйымдастыру комитеті баспасөз мәслихатында да хабарлады.
Екі түрлі кесте тарап кеткен тұста қазақ-қырғыз жанкүйерлер желіде дауласа бастады. Ал Қазақстан спорт және туризм министрлігі де ел құрамасы Көшпенділер ойынында 32 алтынмен жалпы есепте бірінші орын алғанын, Қырғызстанда 30 алтын медаль барын мәлімдеді.
Кейін қазақстандық журналистер жарыстың соңғы күні, яғни, 6 қыркүйекте Қазақстан спортшылары тоғызқұмалақтан жеңген екі алтын жүлдесі мен мангаладан иеленген бір алтын медалі жалпы есепке қосылмай қалғанын айтты.
"БІРІНШІ ОРЫНДЫ ҚАЗАҚСТАН АЛДЫ"
Желіде сын көбейіп, ұйымдастыру комитетіне сұрақ туындаған тұста Көшпенділер ойынының инстаграмдағы ресми парақшасында жарияланған жалпыкомандалық есептің кестесі жоғалып кетті.
6 қыркүйекте Қырғызстан дене шынықтыру және спорт агенттігі ресми парақшаларында "6-Дүниежүзілік көшпенділер ойынының концепциясына сай, елдердің жеңіп алған медальдары бойынша жалпыкомандалық есеп жүргізілмейді" деп мәлімдеді. Дегенмен жарыс ұйымдастырушылары жалпыкомандалық есепті ойын бастала сала жүргізіп келген еді. Елдер арасында медаль есебі жүргізілмейтіні ойындар басталғанда айтылмаған. Бұған дейінгі Көшпенділер ойынында елдер иеленген медальдар бойынша кестелер жарияланып келген.
Ал 7 қыркүйекте Қырғызстан президенті Садыр Жапаровтың баспасөз хатшысы Аскат Алагозов Facebook парақшасында "бүгін ұйымдастыру комитеті Қазақстанның үш спортшысының медальдарын есепке алу туралы шешім шығарды. Соған сай, жалпыкомандалық есепте бірінші орынды Қазақстан алды. Қазақ бауырларымызды жеңістерімен құттықтаймыз" деп мәлімдеді.
6 қыркүйектеҚазақстан президенті Қасым-Жомарт Тоқаев ел құрамасын Көшпенділер ойында "табысты өнер көрсетуімен құттықтап", "жоғары нәтижеге спортшылар тайсалмас табандылықтың, жанқиярлық еңбек пен мұқалмас ерік-жігердің арқасында жеткенін" айтты. Бірақ Ақорда таратқан құттықтауда жалпыкомандалық есептегі дауға байланысты ештеңе айтылмаған еді.
Көшпенділер ойынында Қазақстан мен Қырғызстан арасында бұған дейін де дау болған. Мәселен, 2024 жылы Астанада өткен Көшпенділер ойынында көкпардың финалында екі елдің спортшылары бір-бірін қамшымен ұрды деп айыптаған. Финал уақытша тоқтап, ойыншыларды полиция ажыратқан. Кейін финал қайта жалғасып, Қазақстан 5:4 есебімен жеңіске жеткен еді. Ал қырғыз спортшылары ойын әділ болмады деп марапаттау рәсіміне шықпай қойған. Жанжалдан соң Қазақстан сыртқы істер министрлігі мәлімдеме жасап, бұл жағдай екі елдің достығына әсер етпейді деген еді.
Ал биылғы Көшпенділер ойынында көк бөрү мен көкпардың финалында Қазақстан мен Қырғызстан кездесіп, екі ойында да Қырғызстан басым түсті. Көкпардағы есеп 7:2, көк бөрүдегі есеп 12:0 есебімен аяқталды.
Қырғызстандағы Көшпенділер ойыны 31 тамыз – 6 қыркүйек арасында өтіп, жүзден аса елден 3000 спортшы қатысты. Келесі ойындар 2028 жылы Татарстанның Қазан қаласында өтетіні хабарланды.
