Գյումրիում երեկ «Եվրամեդիա» լրատվամիջոցի լրագրող Կորյուն Սիմոնյանը մոտեցել է «Քաղաքացիական պայմանագրի» պատգամավոր Վիլեն Գաբրիելյանին՝ հարցեր տալու: Լրագրողը փորձել է հասկանալ՝ խմա՞ծ է պատգամավորը, նա էլ ոչ սթափ վիճակում սեռական բնույթի հայհոյանքով պահանջել էր, որ չհրապարակի տեսանյութը: Այդ տեսանյութը հրապարակվեց, ու դրանից հետո լրագրողները Գյումրիի կենտրոնում շրջող պատգամավորից պահանջում էին ներողություն խնդրել ու մանդատը վայր դնել:
Պաշտպանության հանձնաժողովի ՔՊ-ական անդամն անսթափ վիճակում Գյումրիի փողոցներում շարունակում էր մեկնաբանություններն ու հարցազրույցները, այդպես էլ ներողություն չխնդրեց, մանդատից հրաժարվելու պահանջն էլ անիմաստ համարեց, քանի որ ասաց. «2026-ին իշխանությունը փոխվելու է, էլ խի՞ եմ ես մանդատս վայր դնում»:
Շիրակի մարզպետը, «Քաղաքացիական պայմանագրի» մյուս անդամները փորձում էին պատգամավորին բաժանել լրագրողներից ու հեռացնել տարածքից, բայց Գաբրիելյանը դիմադրում էր, բարկանում թիմակիցների վրա, որ փորձում են խանգարել իրեն: Պաշտպանության հանձնաժողովի անդամը, որ մասնակցում է կարևոր քննարկումներին, գաղտնի տեղեկությունների է տիրապետում, չէր ենթարկվում թիմակիցներին: Այդպես էլ չհաջողվեց նրան տարածքից հեռացնել:
Երեկվանից համացանցում տարածվում ու քննարկվում են «Քաղաքացիական պայմանագրի» պատգամավորի մասնակցությամբ տեսանյութերը, բայց իշխանությունը դեռ լուռ է: Ո՛չ վարչապետ Փաշինյանը, ո՛չ էլ կուսակցությունը չեն արձագանքել:
Պատգամավոր Վիլեն Գաբրիելյանի պահվածքը ուղիղ խուլիգանություն է որակում իրավապաշտպան Զարուհի Հովհաննիսյանն ու շեշտում՝ նրանով պետք է զբաղվեն իրավապահները: Ըստ նրա՝ սա միայն լրագրողի աշխատանքը խոչընդոտելու մասին չէ, այլ առհասարակ անհարգալից պահվածք հանրության նկատմամբ:
«Այս վարքագիծը ոչ միայն խուլիգանական արարք է, այլևս որպես այդպիսին պաշտոնատար անձի, այս դեպքում՝ պատգամավորի վարքագծի կոպտագույն խախտումն էր: Նմանատիպ արարքը դատապարտելի է և հենց կուսակցության կողմից պետք է ստանա արժանի գնահատական», - «Ազատության» հետ զրույցում ասաց Զարուհի Հովհաննիսյանը:
Մինչև ՔՊ-ականի թունդ հայհոյանքը, լրագրողներին թիրախավորելու սկանդալի կիզակետում էր մեկ այլ ՔՊ-ական, Պաշտպանության հանձնաժողովի ղեկավար Անդրանիկ Քոչարյանը: Այս շղթան անպատժելիության հետևանքն է, ասում է իրավապաշտպան Հովհաննիսյանը:
Արդյոք Վիլեն Գաբրիելյանն էլ կմնա անպատիժ, ինչպես մյուս ՔՊ-ականները, թե այս անգամ քաղաքական հետևանք կլինի. իշխող թիմից պատգամավոր Արսեն Թորոսյանն ասաց՝ կուսակցությունում քննարկում կլինի, մանրամասներ չհայտնեց: Նա անընդունելի է համարում գործընկերոջ պահվածքը:
«Կարծում եմ, որ պետք է հանրային իշխանության ցանկացած ներկայացուցիչ իր հանրային վարքագծում պահպանի կոռեկտության բոլոր կանոնները, հատկապես նման կարգավիճակ ունեցող անձը», - նշեց Թորոսյանը:
Պատգամավորը մանդատը վայր կդնի՞, թե՞ կուսակցությունից ու խմբակցությունից կհեռացնեն, Արսեն Թորոսյանը դեռ փակագծեր չի բացում: Վիլեն Գաբրիելյանն այսօր Ազգային ժողով է գնացել, բայց լրագրողների հարցերին չի պատասխանել, ոչ էլ ներողություն խնդրել:
Մինչ քաղաքական թիմում կորոշեն անելիքները, լրագրող Կորյուն Սիմոնյանն արդեն ստորագրահավաք է նախաձեռնել, որ դիմեն Ազգային ժողով ու էթիկայի հանձնաժողով ստեղծեն՝ քննելու պատգամավորի վարքը:
«Հորդորում ենք ոստիկանությանը և իրավապահ մարմիններին նախաձեռնել վարույթ՝ Վիլեն Գաբրիելյանի ոչ սթափության պատճառները պարզելու համար, որովհետև մենք ունենք ողջամիտ կասկածներ, որ Գաբրիելյանը միայն ալկոհոլի ազդեցության տակ չէ, որ այդ պահին գտնվում էր», - ասաց Կորյուն Սիմոնյանը:
Թեև Փաշինյանի թիմակցի պահվածքը փաստող տեսանյութերը լայն տարածվել են համացանցում, բայց իրավապահները որևէ քայլ չեն արել: Գլխավոր դատախազությունից «Ազատությանը» փոխանցեցին՝ որևէ գործընթաց չկա Վիլեն Գաբրիելյանի հետ կապված:
