Գեղասահքի աշխարհի նախկին չեմպիոն Վադիմ Նաումովը և նրա կինը՝ Եվգենիա Շիշկովան, զոհվել են Վաշինգտոնում Պենտագոնից ոչ հեռու գտնվող Պոտոմակ գետի վրա ուղևորատար ինքնաթիռի և ռազմական ուղղաթիռի բախման հետևանքով:
ԱՄՆ-ի քաղաքացիական ավիացիայի դաշնային վարչությունը (FAA) հայտնել է, որ բախումը տեղի է ունեցել հունվարի 30-ին՝ տեղական ժամանակով ժամը 9-ի սահմաններում, և որ ներկայումս իրականացվում է լայնածավալ որոնողափրկարարական գործողություն:
American Airlines-ի գործընկեր ավիաընկերության կողմից շահագործվող տարածաշրջանային ուղևորատար ինքնաթիռում եղել է 64 մարդ:
ԱՄՆ բանակի ներկայացուցիչը հաստատել է ԶԼՄ-ների հաղորդագրություններն այն մասին, որ ավիավթարի հետևանքով տուժել է BlackHawk բանակային ուղղաթիռը, որում եղել է երեք զինվոր:
Ռուսական պետական ՏԱՍՍ լրատվական գործակալությունը և սպորտային Sports.ru կայքի աղբյուրներն էլ պնդել են, որ ինքնաթիռում են եղել Նաումովը և Շիշկովան, ովքեր ոսկե մեդալ են նվաճել զուգախաղում 1994 թվականի աշխարհի առաջնությունում:
Այս զույգը, որ հաղթել է նաև 1995/96 Չեմպիոնների շարքի եզրափակչում, գեղասահորդների կարիերան ավարտելուց հետո տեղափոխվեց Միացյալ Նահանգներ և սկսեց մարզչի կարիերան:
2009-ի փետրվարից ի վեր ԱՄՆ-ում մահվան ելքով ուղևորատար ինքնաթիռների մասնակցությամբ ավիավթարներ չեն եղել, սակայն վերջին տարիներին տեղի ունեցած մի շարք միջադեպեր լուրջ մտահոգություններ են առաջացրել թռիչքների անվտանգության վերաբերյալ:
