Ադրբեջանական «Թուրան» գործակալությունը հայտնում է, որ Բաքու է ժամանել Ֆրանսիական Պոլինեզիայի խորհրդարանի և իշխող կուսակցության պատվիրակությունը։
Լրատվամիջոցի տեղեկություններով՝ Ֆրանսիային ենթարկվող կղզու ներկայացուցիչները կքննարկեն Ադրբեջանի հետ համագործակցության հեռանկարները։
«Թուրան»-ի փոխանցմամբ՝ նախատեսված են հանդիպումներ Միլլի Մեջլիսում և այլ պետական կառույցներում, ինչպես նաև համաժողով՝ «Ֆրանսիական Պոլինեզիայի ապագաղութացման իրավունքը» թեմայով։
Բաքվի և Փարիզի հարաբերություններում սկիզբ առած ճգնաժամի ֆոնին Ադրբեջանի իշխանությունները Ֆրանսիայի դեմ դեմարշների շրջանակներում պարբերաբար հիշատակում են «ֆրանսիական գաղութատիրությունը», տարբեր միջոցառումներ նախաձեռնում այդ թեմայով:
Անցած օրերին Նոր Կալեդոնիայում տեղի ունեցած արյունալի անկարգությունների համար Ֆրանսիայի իշխանությունները Բաքվին են մեղադրել՝ պնդելով, որ Ֆրանսիայի տիրապետության տակ գտնվող խաղաղօվկիանոսյան կղզու անջատականները գործարք են կնքել Ադրբեջանի հետ։
