Համապատասխան պայմանավորվածությունների համաձայն՝ Հանձնաժողովներն իրականացնում են Հայաստանի և Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի և երկու երկրների միջև պետական սահմանի սահմանազատման պետական հանձնաժողովի համատեղ գործունեության մասին կանոնակարգի նախագծի համաձայնեցման աշխատանքներ: Այդ մասին այսօր հաղորդում է Հայաստանի փոխվարչապետ, հանձնաժողովների հայկական կողմի համանախագահ Մհեր Գրիգորյանի գրասենյակը:
«2024 թվականի հուլիսի 1-ի դրությամբ Հանձնաժողովներն աշխատանքային կարգով միմյանց են փոխանցել Կանոնակարգի նախագծերը և անցկացրել են մի շարք քննարկումներ:
Բանակցությունները շարունակվում են կառուցողական հունով:
Նախատեսվում է առաջիկայում ավարտել համաձայնեցման գործընթացը», - ասված է հաղորդագրությունում:
Նույնպիսի հաղորդագրություն տարածել է ադրբեջանական կողմը:
Այլ մանրամասներ առայժմ չեն փոխանցվում:
Անվտանգության խորհրդի քարտուղար Արմեն Գրիգորյանն այսօր Ժողովրդավարության հայկական ֆորումի ավարտին հրաժարվեց մեկնաբանել սահմանազատման հանձնաժողովների կանոնակարգի ընդունումը հետաձգելու մասին հայտարարությունը:
Երկու կողմերի ապրիլի 19-ի հայտարարության համաձայն՝ պայմանավորվածություն էր ձեռք բերվել «ավարտին հասցնել Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի և Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին կանոնակարգի նախագծի համաձայնեցման շուրջ աշխատանքները մինչև 2024թ. հուլիսի 1-ը և մեկնարկել դրա ներպետական համաձայնեցման ու հաստատման գործընթացը»:
Մանրամասները տե՛ս այստեղ
