Ռուսաստանի և Ադրբեջանի նախագահները այսօր ևս հեռախոսազրույց են ունեցել։ Ռուսական ՏԱՍՍ-ի հաղորդմամբ՝ Վլադիմիր Պուտինն ու Իլհամ Ալիևը շարունակել են քննարկել «Ադրբեջանական ավիաուղիներ»-ի ինքնաթիռի կործանման հետ կապված հարցեր։
Նույն հարցը նրանք քննարկել էին նաև երեկ կայացած հեռախոսային զրույցի ժամանակ։ Ռուսաստանի նախագահը ներողություն էր խնդրել Ադրբեջանի առաջնորդից օրեր առաջ տեղի ունեցած ավիավթարի կապակցությամբ՝ փաստացի ընդունելով, որ ողբերգական միջադեպի ժամանակ տարածքում ռուսական ՀՕՊ համակարգեր են աշխատել։
Ավելի վաղ Ալիևը հայտարարել է, որ ինքնաթիռը վնասվել է դրսից՝ Գրոզնի քաղաքի մոտ և գործնականում կորցրել է կառավարումը։ Նաև պնդել է, որ գետնից բացված կրակի հետևանքով ինքնաթիռի պոչային հատվածը նույնպես մեծ վնաս է կրել։
