Քննչական կոմիտեն հաղորդում է պետական դավաճանության դեպք բացահայտելու մասին, դեպքով 43-ամյա պայմանագրային զինծառայող է կալանավորվել։
Կոմիտեն, մանրամասնում է՝ կոչումով կրտսեր սերժանտը odnoklassniki.ru սոցիալական ցանցի իր օգտահաշվով 2023-ին հունվարին կապ է հաստատել ադրբեջանական հատուկ ծառայությունների ներկայացուցիչ հանդիսացող, նույն սոցիալական կայքում մտացածին անվամբ օգտահաշվի ներքո քողարկված անձի հետ։
Ըստ Կոմիտեի՝ ծավալված սիրային զրույցների արդյունքում, տվյալ անձը մտերիմ հարաբերություններ է հաստատել ՀՀ ԶՈՒ պայմանագրային զինծառայողի հետ և, հավաքագրել նրան։ 43-ամյա տղամարդն էլ 2023-ի հունվարից մինչև 2024-ի փետրվարն ընկած ժամանակահատվածում իր ստորաբաժանմանը վերաբերող պետական գաղտնիք պարունակող տեղեկություններ է փոխանցել այդ անձին։
Քննչական կոմիտեն նշում է, որ այդ գործողություններով վնաս են պատճառվել Հայաստանի Հանրապետության ինքնիշխանությանը, տարածքային անձեռնմխելիությանը և արտաքին անվտանգությանը:
Տղամարդը հուլիսի 2-ին ձերբակալվել է, տվել է ինքնախոստովանական ցուցմունք։ Նրան մեղադրանք է ներկայացվել, կալանքի միջնորդությունն էլ բավարարվել է։