Իսրայելի վարչապետ Բենյամին Նեթանյահուն երկուշաբթի կայցելի Սպիտակ տուն՝ ԱՄՆ նախագահ Դոնալդ Թրամփի հետ քննարկելու վերջերս հայտարարված մաքսատուրքերը, «Ռոյթերզ»-ին հայտնել են Սպիտակ տան ներկայացուցիչը, ինչպես նաև իսրայելցի երեք պաշտոնյաներ:
Այս հանպատրաստից այցի մասին առաջինը հայտնել Է ամերիկյան Axios-ը, փաստելով՝ եթե այցը տեղի ունենա, Իսրայելի վարչապետը կդառնա առաջին օտարերկրյա առաջնորդը, որն անձամբ կհանդիպի Թրամփին՝ փորձելով բանակցել մաքսատուրքերը չեղարկելու շուրջ:
Թրամփի հայտարարած նոր քաղաքականության արդյունքում իսրայելական ապրանքները Միացյալ Նահանգներ ներմուծվելիս պետք է հարկվեն 17 տոկոսով: ԱՄՆ-ն Իսրայելի ամենամոտ դաշնակիցն է և խոշորագույն առևտրային գործընկերը։
Նեթանյահուի գրասենյակն առայժմ չի հաստատել այցը, որի ընթացքում հավանաբար կքննարկվեն նաև կողմերի հետագա գործողությունները Գազայում պաղեստինյան «Համաս» խմբավորման և Իրանի դեմ:
