«Իշխանությունը մեր դեմ իր միջուկային զենքը գործի դրեց, բայց ես չեմ հանձնվի և չեմ դավաճանի ինձ աջակցող միլիոնավոր ֆրանսիացիներին», - այսօր հայտարարեց Ֆրանսիայի ծայրահեղ աջերի առաջնորդ Մարին Լը Պենը՝ արձագանքելով Փարիզի դատարանի երեկվա որոշմանը, որը հինգ տարով արգելեց նրան ընտրովի պաշտոն զբաղեցնել՝ Եվրամիության միջոցները չարաշահելու համար։
«Համակարգը հանեց իր միջուկային ռումբը, և եթե նրանք այդպիսի հզոր զենք են կիրառում մեր դեմ, նշանակում է, որ մենք կարո՛ղ ենք հաղթել ընտրություններում, և նրանք ընդունում են, որ մեր դեմ մինչ օրս կիրառված իրենց քայլերն անօգուտ են եղել, և ստիպված են ճնշումներն այլ մակարդակի հասցնել», - պնդում է Լը Պենը։
Ֆրանսիայում և երկրի սահմաններից դուրս շատերն են նրա դեմ դատավճիռը համարում երկրաշարժ՝ քաղաքական դաշտում։ «Ֆրանսիայի պատմության մեջ առաջին անգամ դատարանը նախագահական ընտրություններից երկու տարի առաջ քաղաքական մահապատժի դատապարտեց ամենաբարձր վարկանիշն ունեցող թեկնածուին», - ասում է «Իպսոս» միջազգային հետազոտական կենտրոնի հանրային կարծիքի բաժնի տնօրեն Ստեֆան Զումստիգը:
«Ազգային միավորման» առաջնորդը, որ հայտնի է ծայրահեղ ազգայնական հայացքներով, Եվրամիության ու ներգաղթյալների հանդեպ կոշտ քննադատությամբ, նախագահ Մակրոնի հիմնական քաղաքական հակառակորդն էր Ֆրանսիայի նախորդ երկու նախագահական ընտրություններում։ «2027-ի քվեարկությունը լինելու էր իշխանության գալու չորրորդ ու վերջին փորձը», - հայտարարել էր 56-ամյա Լը Պենը։ Դատարանը, սակայն, այդ ծրագրերի վրա մեծ խաչ քաշեց երեկ։
Կուսակցությունը կոչ է արել աջակիցներին այս շաբաթ-կիրակի երկրով մեկ բողոքի զանգվածային ցույցեր անցկացնել։ «Քաղաքական գործիչները չպետք է օրենքից վեր դասվեն, բայց նաև օրենքները չպետք է օգտագործվեն մեծ հեղինակություն ունեցող գործիչներին քաղաքական պայքարից դուրս թողնելու համար», - երեկ հայտարարել է առաջնորդ Ժորդան Բարդելան։
Դատավորները Լը Պենի դեմ ապացույցներն են վկայաբերում և մեղադրական եզրակացությունը, որ ձգվում է 150 էջից ավելի։ Ըստ այդ նյութերի, Լը Պենը տասնամյակներ առաջ՝ Եվրախորհրդարանի պատգամավոր եղած ժամանակ, այդ կառույցի հաշվին օգնականներ է վարձել, որոնք, սակայն, աշխատել են ոչ թե Բրյուսելի, այլ՝ Լը Պենի սեփական կուսակցության համար։ Դատավորները փաստել են, որ Լը Պենը շուրջ 4 միլիոն դոլարի հասնող աշխատավարձերը չի յուրացրել, բայց չարաշահել է Եվրամիության միջոցները։ Դրա համար պատիժը քաղաքական գործիչներն իրենք էին խստացրել՝ բոլորովին վերջերս։
Լը Պենի համախոհները, իրենց հերթին, պնդում են, թե իշխող էլիտաներն արշավ են սկսել Եվրոպայում վերջին տարիներին մեծ թափ հավաքող ազգայնականության դեմ։ Շատերն են զուգահեռներ տանում Ռումինիայի հետ, որտեղ ամիսներ առաջ նախագահական ընտրությունների առաջին փուլի արդյունքները չեղարկվեցին ծայրահեղ աջ թեկնածու Կալին Գեորգեսկուի հաղթանակից հետո՝ Ռուսաստանի միջամտության մեղադրանքով։
«Սա մղձավանջային մի ֆիլմ է, բայց մեզ լռեցնել չի լինի», - X-ում գրել է Իտալիայի փոխվարչապետ, ազգայնական Մատեո Սալվինին, Նիդերլանդների աջ ծայրահեղականների առաջնորդ Գեերդ Վիլդերսը՝ պնդել, որ չնայած դատավճռին՝ Լը Պենը կհաղթի հաջորդ ընտրություններում։
Մտահոգություններ են հնչել նաև օվկիանոսի այն կողմից․ Միացյալ Նահանգների նախագահ Դոնալդ Թրամփը դատավճիռը շատ լուրջ հարց է որակել և համեմատել ընտրություններից առաջ իրեն ներկայացված մեղադրանքների հետ:
Ինքը՝ Լը Պենը հայտարարել է, թե կբողոքարկի որոշումը, սակայն հստակ չէ՝ արդյոք մինչև 2027-ը դատական վերին ատյանները կհասցնեն լսել այդ գործը և եթե հասցնեն, ինչ որոշում կկայացնեն։
