Նոյեմբերի 28-ին «Քեզ համար, Հայաստան» խորագրի ներքո անցկացված «Հայաստան» համահայկական հիմնադրամի 27-րդ հեռուստամարաթոնի ընթացքում այս պահի դրությամբ հավաքագրվել է շուրջ 15 միլիոն 302 հազար 500 դոլար: Այս մասին հաղորդում է Հիմնադրամը՝ ընդգծելով, որ դրամահավաք-միջոցառումները դեռ շարունակվում են, իսկ վերջնական արդյունքները կամփոփվեն տարեվերջին:
Հաղորդագրության համաձայն՝ «Հեռուստամարաթոն 2024»-ի արդյունքներն ըստ երկրների հետևյալն են.
- Հայաստան՝ 1 միլիոն 218 հազար185 դոլար
- ԱՄՆ՝ 7 միլիոն 700 հազար 717 դոլար
- Ֆրանսիա՝ 3 միլիոն 430 հազար դոլար
- Տորոնտո (Կանադա)՝ 1 միլիոն 52 հազար դոլար
- Գերմանիա՝ 133 հազար դոլար
- Նիդերլանդներ՝ 50 հազար դոլար
- Արգենտինայի և Բրազիլիայի համատեղ դրամահավաք՝ 47 հազար 529 դոլար
- Մեծ Բրիտանիա՝ 40 հազար դոլար
- Արգենտինա՝ 39 հազար դոլար (հավելյալ հանգանակություններ)
- Ավստրալիա՝ 20 հազար դոլար
- Ռումինիա՝ 1 995 դոլար
- Անանուն նվիրատուներ տարբեր երկրներից՝ 1 միլիոն 570 հազար դոլար
Հիմնադրամը նշում է, որ «Քեզ համար, Հայաստան» խորագրով «Հեռուստամարաթոն 2024»-ի դրամական միջոցները կուղղվեն մի շարք ռազմավարական ծրագրերի իրականացմանը՝
- սահմանային համայնքների խմելու և ոռոգման ջրի համակարգերի վերակառուցմանն ու կառուցմանը,
- համայնքային բժշկական նոր կենտրոնի կառուցմանը,
- սահմանային համայնքներում գտնվող դպրոցներում, մանկապարտեզներում, համայնքային կենտրոններում արևային կայանների տեղադրմանը,
- սահմանային համայնքների սոցիալապես անապահով ընտանիքների տներում արևային ջրատաքացուցիչների տեղադրմանը,
- բռնի տեղահանված արցախցի կանանց բիզնես կարողությունների հզորացմանը,
- մշակութային և ստեղծարար նախաձեռնությունների աջակցությանը։
Բացի վերոնշյալից, 2025-2026թթ․ ընթացքում կիրականացվեն «Հեռուստամարաթոն-2024»-ին առաջադրված երկու լայնամասշտաբ նախագծերը, դրանք են՝
- Բնակելի ավանի կառուցում հենաշարժողական խնդիրներ ունեցող պատերազմի վետերանների և նրանց ընտանիքների համար Կոտայքի մարզի Բալահովիտ համայնքում՝ «Զինվորի տուն» բարեգործական ՀԿ-ի հետ համատեղ:
- Արցախի մշակութային ժառանգության կենտրոնի և արցախցի գորգագործների ընտանիքների համար բնակելի ավանի կառուցում Գյումրիում:
