Հայաստանի ռազմական գերատեսչությունը հերքում է Բաքվի պնդումը, թե իբր ապրիլի 9-ին՝ ժամը 19:25-19:35-ն ընկած ժամանակահատվածում, ՀՀ ԶՈՒ ստորաբաժանումները կրակ են բացել սահմանագոտու հարավարևելյան հատվածում տեղակայված ադրբեջանական դիրքերի ուղղությամբ։
Ադրբեջանի ՊՆ-ն մասնավորապես նշել է, թե հայկական կողմը Խոզնավար և Խնածախ բնակավայրերի ուղղությամբ տեղակայված դիրքերից կրակել է ադրբեջանական դիրքերի ուղղությամբ։
Բաքուն ավելի վաղ էլ հայտարարել էր, թե ապրիլի 8-ին՝ ժամը 19:20-ից մինչև 22:30-ը, Հայաստանի զինված ուժերի ստորաբաժանումները Վարդենիսի և Վերին Շորժայի դիրքերից կրակել են ադրբեջանական բանակի դիրքերի ուղղությամբ։ Այս պնդումը ևս Երևանը հերքել է:
Հայաստանի պաշտպանության նախարարությունը կրկին հիշեցնում է՝ վարչապետի աշխատակազմն առաջարկել է հրադադարի ռեժիմի խախտման դեպքերի և/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ ստեղծել, ինչին մինչև օրս Ադրբեջանը չի արձագանքել։
Ռազմական գերատեսչությունը վերահաստատում է՝ պատրաստ է հետաքննել Ադրբեջանի հաղորդագրությունը հիմնավորող փաստերը՝ դրանք Հայաստանին փոխանցելու պարագայում։
Շաբաթներ շարունակ Բաքուն Երևանին մեղադրում է իր դիրքերը թիրախավորելու համար, այս նույն ընթացքում Սյունիքի սահմանային բնակավայրերից հաղորդում են արդեն երրորդ շաբաթն անընդմեջ չդադարող կրակոցների մասին։
