ԱՄՆ-ի Գերագույն դատարանը ընտրված նախագահ Դոնալդ Թրամփին ազատել է պատժից՝ պոռնոդերասանուհի Սթորմի Դենիելսին վճարելու գործով, միևնույն ժամանակ նրա մեղավորությունը չչեղարկելով։ Չնայած Թրամփը «գումար լռության դիմաց» գործով պատիժ չի կրի, սակայն դատարանը չի բեկանել և ուժի մեջ է թողել Թրամփի դատավճիռը, որ 2024 թվականի մայիսին կայացրել էր երդվյալ ատենակալների դատարանը։
Դատավոր Խուան Մերչանը հայտարարել է, որ Թրամփի համար «անվերապահ ազատումն» է ընտրել որպես դատավճիռ, քանի որ նա ընտրված նախագահ է, իսկ ցանկացած պատիժ նրան կխանգարի կատարել նախագահական պարտականությունները։ Միևնույն ժամանակ դատավորը հավելել է, որ դա չի չեղարկում կատարված հանցագործության լրջությունը։
Թրամփը դատական նիստին մասնակցել է Ֆլորիդայի իր նստավայրից տեսակապով։ Նա իր դեմ դատաքննությունը համարել է «վհուկների որս» և հայտարարել է, որ դա հաշվապահական սխալ է, իր թղթաբանությամբ զբաղվում է ոչ թե ինքը, այլ իր հաշվապահությունը։
Թրամփը մեղավոր էր ճանաչվել դեռ 2024 թվականի մայիսին փաստաթղթեր կեղծելու գործով, որի նպատակն էր թաքցնել վճարումները պոռնոաստղ Սթորմի Դենիելսին։ Այս ամենը, ըստ քննիչների, տեղի է ունեցել 2016 թվականի ընտրություններից առաջ, թույլ չտալու համար, որ Դենիելսը բացահայտի 2006 թվականին իր ու Թրամփի ենթադրյալ սեռական կապը:
Ինքը՝ Դոնալդ Թրամփը, միշտ հերքել է իր մեղքը՝ հետապնդումը քաղաքական համարելով։ Չնայած պատժի բացակայությանը, Թրամփը փաստորեն կդառնա ԱմՆ առաջին նախագահը, որ պաշտոնը կստանձնի՝ փաստորեն ունենալով դատվածություն։
