«Կենտրոնական ընտրական հանձնաժողովը գտնում է, որ թիվ 12/13, 10/51 և 36/65 ընտրական տեղամասերում քվեարկության արդյունքների անվավեր ճանաչումը չի ազդում ընտրությունների արդյունքների վրա», նիստում հայտնեց ԿԸՀ նախագահ Վահագն Հովակիմյանը:
Այս հայտարարությունից հետո դահլիճում ընդդիմության ներկայացուցիչներն իրենց դժգոհությունն արտահայտեցին, ԲՀԿ ներկայացուցիչ Իվետա Տոնոյանը հայտարարեց. «Դուք խոչընդոտում եք ՀՀ-ում ժողովրդավարության կայացմանը, Ձեր իշխանությունների հռչակած ժողովրդավարության կայացմանը»:
ԿԸՀ նախագահ Վահագն Հովակիմյանը շարունակեց ընթերցել որոշումը. «ԿԸՀ-ն որոշում է՝ ՀՀ ԱԺ 2026թ-ի հունիսի 7-ին կայացած հերթական ընտրությունների նախապատրաստման և քվեարկության ընթացքում տեղի չեն ունեցել ՀՀ Ընտրական օրենսգրքի այնպիսի խախտումներ, որոնք կարող էին ազդել ընտրության արդյունքների վրա»:
Կենտրոնական ընտրական հանձնաժողովի արտահերթ նիստում ելույթ ունեցան ընդդիմության ներկայացուցիչները, ովքեր պահանջում են վերաքվեարկություն:
«Ուժեղ Հայաստանի» ներկայացուցիչ Արամ Վարդևանյանն ասաց. «Մենք չենք կարող ասել, որ այս ընտրությունները եղել են օրինական, վերաքվեարկությունը պարտադիր է»:
Այս շաբաթ ընտրատարածքային հանձնաժողովներում տեղի ունեցած վերահաշվարկից հետո «Բարգավաճ Հայաստան» կուսակցության ձայներն ավելացան 147-ով, սակայն դրան զուգահեռ 222-ով պակասեցին՝ 3 ընտրատեղամասերի ՝ 35/ 65 -ի, 10/51 -ի և 12/13 -ի արդյունքներն անվավեր ճանաչվելուց հետո:
ԲՀԿ-ն ևս պահանջում է վերաքվեարկություն այդ ընտրատեղամասերում: ԲՀԿ-ից Իվետա Տոնոյանը
ԿԸՀ նախագահ Վահագն Հովակիմյանին հարց ուղղեց. «Ես, իրոք, ուզում եմ հարց ուղղել Ձեզ, Դուք, իրոք, էդպե՞ս եք մտածում... որ այս տեղամասերում ընտրությունների արդյունքները անվավեր ճանաչելը որևէ էական և գործուն ազդեցություն չունեն ընտրական արդյունքների ամփոփման վրա... Ոտնահարվում է 3000-ից ավել ընտրողների իրավունքը, մարդիկ գնացել են, քվեարկել են տարբեր քաղաքական ուժերի օգտին»։
Եզրափակելով ելույթը, Տոնոյանը դարձյալ խոսքը ԿԸՀ նախագահին ուղղեց. «Ո՞րն է էական ազդեցությունը, եթե ընդամենը 200 ձայնի համամասնությամբ դուք «Բարգավաճ Հայաստան» կուսակցությանը միտումնավոր, հետևողական կերպով զրկում եք խորհրդարանում ներկայացված լինելու հնարավորությունից։ Խնդիրը էստեղ «Բարգավաճ Հայաստան կուսակցության» ներկայացվածության մեջ չէ։ Խնդիրը էստեղ այն իրավական մանիպուլյացիաներն են ու թվաբանական մանիպուլյացիաներն են, որոնք հետևողականորեն օրերի ընթացքում իրականացվել են և հիմա էլ շարունակում են իրականացվել»:
Իշխող «Քաղաքացիական պայմանագրից» Արուսյակ Ջուլհակյանն էլ նշեց.- «Ընտրությունների ժամանակ լիարժեք ապահովվել է ՀՀ քաղաքացիների կողմից իրենց ընտրական իրավունքի իրացումը, քաղաքացիները լիարժեք իրացրել են իրենց ընտրական իրավունքը: Եթե այս ընտրական պրոցեսում որևէ բան եղել է համատարած, ապա միակ համատարած բանը, որ արձանագրվել է այս ընտրությունների ընթացքում դա մասսայական ընտրակաշառքի բաժանումն է»:
Ջուլհակյանը նշեց, որ ինքը ևս դժգոհություն ունի ԿԸՀ-ից.- «Նման խաղախտումները չէին կարող չազդել ընտրությունների ազդեցությունների վրա և ես կարծում եմ, որ դուք դա պետք է արձանագրեիք և գնահատեիք այդ խախտումների ազդեցությունն ընտրությունների արդյունքների վրա»:
ԿԸՀ-ի առջև ընդդիմության ակցիայի մասնակից, բռնցքամարտիկ Իսրայել Հակոբկոխյանը Ռուսաստանի նախագահ Վլադիմիր Պուտինի նկարով շապիկ հագած հայտարարեց, որ հացադուլ է սկսում, մինչև նոր ընտրություններ անցկացվեն:
ԿԸՀ-ն հրապարակեց ընտրությունների վերջնական արդյունքները, ըստ այդմ.
«Ուժեղ Հայաստան»-ը ստանում է 340 006 քվե կամ 23.2710 տոկոս
«Բարգավաճ Հայաստան» կուսակցությունը՝ 58 287 քվե կամ 3.9893 տոկոս
«Քաղաքացիական պայմանագիրը»՝ 726 819 կամ 49.7456 տոկոս
«Հայաստան» դաշինքը՝ 144 983 կամ 9.9231 տոկոս
ԿԸՀ-ն ամփոփում է ընտրությունների արդյունքները, զուգահեռ ընդդիմությունն ակցիա է անում
ԿԸՀ-ի դիմաց երեք ուժերի՝ «Ուժեղ Հայաստանի», «Հայաստան» դաշինքի և «Բարգավաճ Հայաստան» կուսակցության ներկայացուցիչներն են: Հավաքվածները պահանջում են չեղարկել ընտրությունների արդյունքները և նոր ընտրություններ անցկացնել:
Մինչ ԿԸՀ նիստի մեկնարկը Գագիկ Ծառուկյանի մամուլի խոսնակ, ԲՀԿ ցուցակով պատգամավորության թեկնածու Իվետա Տոնոյանը լրագրողների հետ զրույցում նշեց, որ խնդիրը «Բարգավաճ Հայաստանի» 4 տոկոս անցողիկ շեմը հաղթահարելը և խորհրդարանում ներկայացված լինելը չի.
«Սա հնարավորություն է արդարությունը վերականգնելու, որովհետև ամբողջ ընտրությունների արդյունքի համապատկերն է փոխվում։ Ընդհանրապես, կասկածի տակ է դրվում ընտրությունների ամբողջ գործընթացի լեգիտիմությունը, սա երկրորդ։ Եվ երրորդը՝ որևէ մեկն իրավունք չունի ո՛չ մանդատագողությամբ, ո՛չ ձայնագողությամբ զբաղվելու և, կոնկրետ, նման թքած վերաբերմունք ունենալու ընտրողների ընտրելու իրավունքի վրա», - նշեց նա։
Ընդդիմադիր գործիչները բողոքի ակցիայի ընթացքում նշում էին, որ հունիսի 7-ի խորհրդարանական ընտրությունների ժամանակ և դրան նախորդող ընտրական ժամանակաշրջանում «համակարգված և համատարած ընտրախախտումներ են տեղի ունեցել»։ Իշխանությունն ի պատասխան բազմիցս հայտարարել է, թե ընդդիմությունը կամիր գիծ է հատել՝ բաժանելով ընտրակաշառք:
Վարչապետ Նիկոլ Փաշինյանն էլ այսօր հայտարարեց.- «Առաջիկա մեր քաղաքական առանցքային օրակարգը չի կարող լինել այլ բան, քան պատերազմի եռագլուխ կուսակցությանը բառիս բուն իմաստով ունեզրկելը: Սրանք պետք է հացին կակա ասեն, որ մտքներով չանցնի այլևս ընտրակաշառք բաժանել: Սա է քաղաքական օրակարգը»:
Վարչական դատարանն ուշ գիշեր մերժել է «Բարգավաճ Հայաստան» կուսակցության՝ ԿԸՀ-ի դեմ ներկայացված երկու հայցերը, «սակայն դատավոր Արթուր Ավագյանը արձանագրել է խախտում և վերաքվեարկություն նշանակելու անհրաժեշտություն»,- հայտնում է Գագիկ Ծառուկյանի խոսնակ Իվետա Տոնոյանը:
Այս շաբաթ ընտրատարածքային հանձնաժողովներում տեղի ունեցած վերահաշվարկից հետո ԲՀԿ ձայներն ավելացան 147-ով, սակայն դրան զուգահեռ 222-ով պակասեցին՝ 3 ընտրատեղամասերի ՝ 35/ 65 -ի, 10/51 -ի և 12/13 -ի արդյունքներն անվավեր ճանաչվելուց հետո:
Արդյո՞ք ԿԸՀ-ն այդ տեղամասերում վերաքվեարկության որոշում կկայացնի, պարզ կլինի այսօր՝ ԿԸՀ երեկոյան նիստում: Նիստում հրապարակվելու է ոչ միայն ընտրությունների վերջնական արդյունքները, այլև քննարկվելու է 3 տեղամասերում վերաքվեարկություն անցկացնելու հարցը, ինչպես նաև ընտրություններն անվավեր ճանաչելու «Ուժեղ Հայաստանի» և «Միասնության Թևերի» դիմումները:
2 ընտրատեղամասերում ընտրությունների արդյունքներն անվավեր ճանաչելու ԿԸՀ որոշումների դեմ ԲՀԿ-ն հայցեր է ներկայացրել վարչական դատարան:
ԲՀԿ հայցադիմումի քննությանը որպես 3-րդ կողմ մասնակացում են «Ուժեղ Հայաստանի» ներկայացուցիչ Արամ Վարդևանյանը և «Հայաստան» դաշինքից Արծվիկ Մինասյանը: Պատասխանող կողմ է հանդես գալիս ԿԸՀ փոխնախագահ Նունե Հովհաննիսյանը:
ԲՀԿ ներկայացուցիչ, փաստաբան Արամ Օրբելյանը նիստում նշեց, որ 2 տեղամասերում ընտրությունների արդյունքներն անվավեր ճանաչելու հետևանքով՝ ԲՀԿ-ի համար 4 տոկոսի շեմի հաղթահարման խնդիր է առաջանում:
Արդյո՞ք ԿԸՀ-ն այդ տեղամասերում վերաքվեարկության որոշում կկայացնի, առայժմ պարզ չէ:
ԲՀԿ ներկայացուցիչները դատարանում պնդեցին, որ ԿԸՀ-ն իրավունք չուներ անվավեր ճանաչել ընտրատեղամասերի արդյունքները, քանի որ դա ընտրատարածքային ընտրական հանձնաժողովի լիազորությունն է: Փոխարենը՝ ԿԸՀ-ն կարող էր վերաքվեարկության որոշում կայացնել, ինչը չի արել: Հետևաբար, հայցվոր կողմը դատարանից պահանջեց բեկանել ԿԸՀ որոշումը: ԿԸՀ փոխնախագահը, սակայն, հակադարձեց՝ գործել են ընտրական օրենսգրքի շրջանակում, հետևաբար խնդրեց հայցը մերժել:
Կենտրոնական ընտրական հանձնաժողովի նիստը նախատեսված է վաղը երեկոյան ժամը 18:00-ին:
Նիստում հրապարակվելու է ոչ միայն ընտրությունների վերջնական արդյունքները, այլև քննարկվելու է 3 տեղամասերում վերաքվեարկություն անցկացնելու հարցը, ինչպես նաև ընտրություններն անվավեր ճանաչելու «Ուժեղ Հայաստանի» և «Միասնության Թևերի» դիմումները:
«Հայաստան» դաշինքը մանդատները վերցնել-չվերցնելու շուրջ դեռևս վերջնական որոշում չունի, այն պետք է կայացվի խորհրդակցելով ընդդիմադիր այլ ուժերի հետ, հայտարարել է դաշինքի առաջնորդ, երկրորդ նախագահ Ռոբերտ Քոչարյանը:
«Վերջնական որոշում չկա, բայց հետևյալը պետք է ասեմ՝ պայքարը, եթե պետք է շարունակվի, ապա պետք է օգտագործես բոլոր գործիքները, որոնք հնարավոր են»,- հայտարարել է Քոչարյանը՝ շարունակելով- «Հիմա մանդատները դա լուրջ գործիք են պայքարը շարունակելու համար։ Իմ անձնական մոտեցումը սա է, բայց, կրկնեմ, վերջնական որոշում չկա, բայց որ պայքարը շարունակելու են, ուղղակի, այստեղ կասկած չի կարող»:
ԿԸՀ-ն ամփոփել է վերահաշվարկի արդյունքները
Կենտրոնական ընտրական հանձնաժողովն (ԿԸՀ) ամփոփել է ընտրատարածքային ընտրական հանձնաժողովների իրականացրած վերահաշվարկի արդյունքները: Վերահաշվարկվել են 637 ընտրական տեղամասերի քվեարկության արդյունքները:
«Ռեֆորմիստների կուսակցություն»՝ 1456 քվեն նվազել է 11-ով։
«Բոլորին դեմ եմ» ժողովրդավարական կուսակցություն՝ 21 հազար 477 քվեն նվազել է 244-ով։
«Ուժեղ Հայաստան» դաշինք՝ 340 հազար 88 քվեն ավելացել է 508-ով։
Հայաստանի շնորհապետական կուսակցություն՝ 30 հազար 807 քվեն նվազել է 117-ով։
«Նոր ուժ» ռեֆորմիստական կուսակցություն՝ 25 հազար 624 քվեն նվազել է 21-ով։
«Միասնության թևեր» կուսակցություն՝ 33 հազար 644 քվեն նվազել է 56-ով։
«Բարգավաճ Հայաստան» կուսակցություն՝ 58 հազար 378 քվեն ավելացել է 147-ով։
«Ազգային ժողովրդավարական բևեռ» համահայկական կուսակցություն՝ 5485 քվեն ավելացել է 5-ով։
«Քոչարի ազգային վերածնունդ և Ազգի զարթոնք» կուսակցություն՝ 1984 քվեն ավելացել է 1-ով։
Հայ ազգային կոնգրես կուսակցություն՝ 3206 քվեն նվազել է 47-ով։
«Հանրապետություն» կուսակցություն՝ 15 հազար 835 քվեն ավելացել է 8-ով։
Քրիստոնեա-ժողովրդավարական կուսակցություն՝ 2679 քվեն մնացել է անփոփոխ։
«Ժողովրդավարական համախմբում» կուսակցություն՝ 5284 քվեն նվազել է 14-ով։
«Դեմոկրատիա, օրենք, կարգապահություն» կուսակցություն՝ 26 հազար 567 քվեն նվազել է 819-ով։
«Քաղաքացիական պայմանագիր» կուսակցություն՝ 727 հազար 820 քվեն ավելացել է 1148-ով։
«Հայաստան» կուսակցությունների դաշինք՝ 145 հազար 113 քվեն ավելացել է 217-ով։
«Հանուն Հանրապետության ժողովրդավարության պաշտպանների դաշինք» կուսակցություն՝ 6750 քվեն ավելացել է 18-ով։
«Լուսավոր Հայաստան» կուսակցություն՝ 7258 քվեն ավելացել է 55-ով:
Անճշտությունների գումարային չափը, ըստ ԿԸՀ-ի, 1279-ից ավելացել է 230-ով: Անվավեր քվեաթերթիկների թիվը 17097-ից նվազել է 859-ով:
Ավելի վաղ ԿԸՀ-ն անվավեր է ճանաչել երեք ընտրատեղամասի քվեարկության արդյունքները: