Երևանը բարձր է գնահատում Փարիզի աջակցությունը Հայաստանի ինքնիշխանությանը, տարածքային ամբողջականությանը և ժողովրդավարությանը, հետագա ամրապնդմանը, Գորիսում ընթացող «Հայաստան-Ֆրանսիա ապակենտրոնացված համագործակցության» 5-րդ համաժողովի բացմանը հայտարարեց փոխարտգործնախարար Վահան Կոստանյանը:
«Բարձր ենք գնահատում նաև երկկողմ և եվրոպական ձևաչափով ցուցաբերվող Ֆրանսիայի աջակցությունը Հայաստանի պաշտպանական կարողություններին և տնտեսական դիմակայունության ամրապնդմանը, ինչպես նաև աջակցությունը Հայաստան-ԵՄ գործընկերության ընդլայնմանը, Եվրոպային առավել մոտենալու մեր ցանկություններին» ,- նշեց Կոստանյանը:
Փոխարտգործնախարարը հավելեց, որ այս համաժողովի կազմակերպումը Գորիսում բնական և սպասելի է՝ հաշվի առնելով Հայաստանի համար ռազմավարական նշանակություն ունեցող շրջանների և դրանց թվում առաջնահերթ Սյունիքի մարզի զարգացման և դիմակայունության բարձրացման նպատակը:
«Այս հստակ քաղաքական կամքի մասին է խոսում այսօր Գորիսում կայանալիք Ֆրանսիայի պատվավոր հյուպատոսի գրասենյակի պաշտոնական բացումը»,- հայտարարեց փոխարտգործնախարարը:
Վահան Կոստանյանը հույս հայտնեց, որ համաձայն երկու երկրների կառավարությունների միջև ձեռք բերված պայմանավորվածությունների՝ Սյունիքում մոտ ապագայում կտեսնեն ֆրանսիական ընկերությունների ներգրավումը ռազմավարական նշանակության ենթակառուցվածքային նախագծի իրականացման գործում:
Նախորդ շաբաթ Երևանում գտնվող Ֆրանսիայի արտգործնախարարը հայտնել էր, որ Փարիզը պատրաստվում է Գորիսում հյուպատոսական գործակալություն բացել:
