ԱՄՆ-ի, Ուկրաինայի և Եվրոպայի պաշտոնյաները չորեքշաբթի օրը կհանդիպեն Լոնդոնում՝ քննարկելու Ուկրաինայում Ռուսաստանի պատերազմը դադարեցնելու հարցը:
Բանակցություններին կմասնակցի ԱՄՆ նախագահի հատուկ ներկայացուցիչ Քիթ Քելլոգը:
«Գնդակը ռուսական կողմում է ... Մենք միանշանակ աջակցում ենք նախագահ Թրամփի փորձերին՝ խաղաղություն հաստատելու և Ռուսաստանին ուղղված Ուկրաինայի կոչերին լիակատար հրադադարի մասին»,-հայտարարել է Մեծ Բրիտանիայի վարչապետ Քիր Սթարմերը:
Թրամփի հատուկ բանագնաց Սթիվ Ուիթքոֆը չի մասնակցի Լոնդոնի բանակցություններին: Սակայն, ինչպես հայտնել են Սպիտակ տնից, Մոսկվայի հետ Վաշինգտոնի դիվանագիտության զուգահեռ ճանապարհին նա այս շաբաթ Ռուսաստանում կհանդիպի Ռուսաստանի նախագահ Վլադիմիր Պուտինի հետ:
Լոնդոնի հանդիպումը նախորդ շաբաթ Փարիզում կայացած նմանատիպ հանդիպման շարունակությունն է, որի ընթացքում ԱՄՆ-ի, Ուկրաինայի և Եվրոպայի պաշտոնյաները քննարկել էին խաղաղության հասնելու ուղիները:
