Ադրբեջանի պահանջած, այսպես կոչված, «Զանգեզուրի միջանցք»-ը Փաշինյանի կառավարության համար շարունակում է մնալ կարմիր գիծ, պնդում է իշխող «Քաղաքացիական պայմանագիր» կուսակցության փոխնախագահ Վահագն Ալեքսանյանը։
Ադրբեջանի ղեկավարը մինչդեռ շարունակում է Հայաստանից պահանջել միջանցք։ Ռուսաստանի նախագահի հետ հանդիպումից հետո Ալիևը, հղում անելով նոյեմբերի 9-ի եռակողմ հայտարարությանը, դժգոհել է, թե Հայաստանը «ոտնահարում է այդ կետը, փորձում ազատվել դրանից,» ինչն, ըստ Ալիևի, անհնար է։ Արդյո՞ք սա նշանակում է, որ Ադրբեջանը կանգ չի առնի և ուժով կփորձի ստանալ ուզածը, Ալեքսանյանն ասաց. - «Թույլ տվեք՝ ես չմեկնաբանեմ, բայց կարող եմ միայն ասել, որ Ադրբեջանն ու Ռուսաստանը համատեղ ջանքերով ուղղակի պատռել ու աղբամանն են նետել նոյեմբերի 9-ի համաձայնագիրը»։
Վարչապետ Փաշինյանը բազմիցս պնդել է՝ Ադրբեջանի պատկերացրած միջանցքը Երևանի համար կարմիր գիծ է, Հայաստանից տարածքային պահանջ, և բացի այդ, չի կարող այնպես լինել, որ կողմերից միայն մեկի համար գործի այդ փաստաթուղթը։
Փաշինյանի թիմակիցը վստահեցնում է՝ իշխանության դիրքորոշումն ուժի մեջ է. - «Միակ քաղաքական ուժը, խորհրդարանականների մեջ առնվազն, որ ամեն կերպ ու մինչև վերջ հայտարարել է այն մասին, ու մինչև վերջ կանգնած է մնալու այն գծում, որ դա անթույլատրելի է ու կարմիր գիծ է, «Քաղաքացիական պայմանագիր» կուսակցությունն է», - պնդեց Վահագն Ալեքսանյանը։
Ալիևին ոգևորել է Փաշինյանի զիջելու պատրաստակամությունը. Արթուր Խաչատրյան
Փաշինյանի համար կարմիր գիծ էր նաև Հայաստանի վերահսկողության տակ գտնվող նախկին ադրբեջանաբնակ չորս գյուղերի վերադարձը, «ինքն էր խոստանում ձեռքերը կտրել, բայց Տավուշից ոչինչ չտալ», հիշեցնում է «Հայաստան» խմբակցության պատգամավոր Արթուր Խաչատրյանը։
«Կտրե՞լ է ձեռքը, այսօր ինքը կտրած ձեռքո՞վ էր բարձրացել Ծիծեռնակաբերդ։ Ես զարմանում եմ ընդհանրապես, որ մարդիկ ասում են՝ բայց, ախր իշխանություններն այսպես են ասել։ Իշխանությունն իր բոլոր խոստումները դրժել է», - ասաց նա։
Ընդդիմադիր պատգամավորի համոզմամբ՝ Ալիևին ոգևորել է Փաշինյանի, իր ձևակերպմամբ, «զիջելու պատրաստակամությունը»։ Ըստ Խաչատրյանի՝ Բաքուն կանգ չի առնելու. - «Ալիևն ուզում է ասի՝ գիտես ինչ կա, չկարծեք, թե միայն դրանով վերջացրել եք, չկարծեք, թե դուք միայն այդ տարածքները հանձնելով վերջացրել եք, դուք դեռ ահագաին տալու բան ունե, ինքը շարունակելու է պարտադրել Սահմանադրության փոփոխություն»։
Իլհամ Ալիևը կրկին պահանջել է փոխել նաև Հայաստանի մայր օրենքը, քանի որ Անկախության հռչակագրում հիշատակված է Լեռնային Ղարաբաղի մասին: Նա սա համարել է երկու երկրների միջև խաղաղության պայմանագրի նախապայման։ Սահմանադրության փոփոխության անհրաժեշտության մասին Հայաստանի վարչապետն էլ է խոսել։ Հռչակագրի հղումը հանելու մասին ուղիղ չի ասել, բայց այլաբանորեն կարմիր զգեստի ու ցլերի համեմատությամբ ակնարկել հռչակագիրը մայր օրենքում թողնելու վտանգների մասին։
Այդուհանդերձ, իշխանականներն այն համարում են Հայաստանի ներքին գործը. - «ՀՀ-ն ու ՀՀ ժողովուրդն ինքն է որոշում՝ իր Սահմանադրությունը պիտի փոխի, թե չպիտի փոխի», - ասաց Ալեքսանյանը։
Սահմանադրության փոփոխության մասին BBC-ի հետ զրույցում այսօր խոսել է նաև Ադրբեջանի նախագահի հատուկ հանձնարարություններով ներկայացուցիչը։
Սահմանադրությունից Անկախության հռչակագիրը հանելու քննարկումները թեժ էին այս տարեսկզբին, Փաշինյանը նույնիսկ հանդիպել էր Սահմանադրական բարեփոխումների խորհրդին, բայց հստակ որոշում մինչ այս պահը չկա։
