Բաքուն ունի Ղարաբաղում անվտանգությունն ապահովելու համար անհրաժեշտ ուժեր, ՏԱՍՍ ռուսաստանյան լրատվական գործակալությանն ասել է ՀԱՊԿ գլխավոր քարտուղար Իմանգալի Տասմագամբետովը։
«Ինչ վերաբերում է Լեռնային Ղարաբաղում ռուս խաղաղապահներին, ապա այս պահին դա Ադրբեջանի Հանրապետության տարածքն է, որն ունի անվտանգությունն ապահովելու ուժեր, և ակնհայտ է, որ այդ հարցը միակողմանիորեն չի լուծվում: Տարածաշրջանի կայունությունը մեծապես կախված է Հայաստանի և Ադրբեջանի միջև խաղաղության պայմանագրի ստորագրումից»,- նշել է կառույցի գլխավոր քարտուղարը:
Ապրիլի 17-ին Ադրբեջանի նախագահի օգնական Հիքմեթ Հաջիևը հայտնել է, որ Ադրբեջանի և Ռուսաստանի ղեկավարությունը Ղարաբաղից ռուսական խաղաղապահ զորախմբի վաղաժամկետ դուրսբերման որոշում է ընդունել։ Նրա խոսքով՝ երկու երկրների պաշտպանության նախարարությունները համապատասխան միջոցներ են ձեռնարկում այս որոշումն իրականացնելու համար:
ՏԱՍՍ ռուսաստանյան լրատվական գործակալությունը հիշեցնում է, որ խաղաղապահ զորախումբը տեղակայվել է Ղարաբաղում՝ Ադրբեջանի, Հայաստանի և Ռուսաստանի ղեկավարների կողմից 2020 թվականի նոյեմբերի 9-ի եռակողմ հայտարարության համաձայն։
Խաղաղապահների զորախմբում 1960 զինվորականներ էին, նրանք ունեին հրետանային զենք, 90 զրահափոխադրիչներ, 380 միավոր ավտոմոբիլային և հատուկ տեխնիկա։
Խաղաղապահների տեղակայման ժամկետը սահմանվել էր 5 տարի՝ այն ևս 5 տարով երկարաձգելու հնարավորությամբ, պայմանով, որ կողմերից մեկը ժամկետի ավարտից կես տարի առաջ չհայտարարի եռակողմ համաձայնության այդ դրույթը չեղարկելու մտադրության մասին։
