Եվրամիության արտաքին քաղաքականության պատասխանատու Ժոզեպ Բորելը ժամանել է Կիև, տեղեկացրել է Գերագույն Ռադայի պատգամավոր Ալեքսեյ Գոնչարենկոն։
«Ես հնարավորություն ունեցա խոսել նրա հետ գնացքում: Նա Ուկրաինայի իսկական բարեկամն է»,- Տելեգրամում գրել է Գոնչարենկոն։
Եվրոպական դիվանագիտության ղեկավարը երեկ Լեհաստանում էր։ Նա հայտարարեց, որ Լեհաստանից մեկնելու է Ուկրաինա։
«Ես դեպի Ուկրաինա ճանապարհին եմ։ Ես գնում եմ Կիև և ցանկանում էի կանգ առնել Վարշավայում, քանի որ, իհարկե, մենք պետք է խորհրդակցենք մեր լեհ ընկերների հետ, որպեսզի ավելի լավ հասկանանք, թե ինչ է կատարվում Ուկրաինայում և ինչպես կարող ենք շարունակել մեր աջակցությունը», - հայտարարել է Բորելը՝ տեղեկացնելով, որ Վարշավայում քննարկել է Ուկրաինային աջակցության բոլոր ձևերը՝ ռազմական, ֆինանսական, վերակառուցման, Ռուսաստանի դեմ ուղղված միջոցառումներ, միջազգային իրազեկում, սառեցված ակտիվների օգտագործում։
Վարշավայում, մամուլի ասուլիսում, Բորելը խոսել է նաև Ռուսաստանի դեմ պատժամիջոցների 13-րդ փաթեթի մասին՝ նշելով՝ սահմանափակող միջոցներ կներդրվեն այն ընկերությունների նկատմամբ, որոնք օգնել են Մոսկվային շրջանցել պատժամիջոցները։
Նա ընդգծել է, որ Եվրամիությունը ցանկանում է պատժամիջոցների փաթեթը հաստատել մինչև փետրվարի 24-ը՝ Ուկրաինայում ռազմական գործողությունների մեկնարկի երկրորդ տարելիցը։
Վերջին անգամ Բորելը Կիև էր այցելել 2023 թվականի հոկտեմբերին։ Եվրոպական դիվանագիտության ղեկավարն այն ժամանակ հանդիպել էր Ուկրաինայի նախագահ Վլադիմիր Զելենսկու, արտգործնախարար Դմիտրի Կուլեբայի և պաշտպանության նախարար Ռուստեմ Ումերովի հետ։
