Formula հեռուստաալիքի փոխանցմամբ, Edison Research կենտրոնն անցկացրել է հարցում, որի արդյունքների համաձայն՝ վրացիների ավելի քան 50 տոկոսը կողմ է նախկին նախագահ Միխեիլ Սաակաշվիլիին ներում շնորհելու գաղափարին:
Հարցումն անցկացվել է Վրաստանում 18 տարեկանից բարձր 1500 քաղաքացիների շրջանում։
Նախագահ Սալոմե Զուրաբիշվիլիի կողմից Սաակաշվիլիին ներում շնորհելուն կողմ է արտահայտվել հարցվածների 58 տոկոսը, դեմ՝ 42 տոկոսը:
Վրաստանի ընդդիմությունը բազմիցս է նախագահ Զուրաբիշվիլիին կոչ արել ներում շնորհել Սաակաշվիլիին, բայց նախագահն արձագանքել է, թե նախկին նախագահը մեղադրվում է տարբեր հոդվածներով, և եթե ներում շնորհվի այն գործերով, որոնցով արդեն դատական վճիռներ են ընդունվել, ապա իշխանությունները կարող են Սաակաշվիլիին ձերբակալել մյուս գործերով:
Բացի այդ, ըստ նախագահ Զուրաբիշվիլիի, Սահակաշվիլիի ազատ արձակումը կարող է բացասական արձագանք և պառակտումներ հարուցել Վրաստանի հասարակության մեջ, ինչը կհանգեցնի ներքաղաքական նոր ճգնաժամի:
