«Այն, որ մենք 2018 թվականից մինչև այսօր Երևանում ահռելի գործ ենք արել, այնքան գործ ենք արել, որ քաղաքապետի մի շարք ընդդիմադիր, նախկինում մեզ հետ աշխատած թեկնածուներ հիմա դա ատամներով և եղունգներով քաշում են դեպի իրենց կողմը»,- այսօր «Քաղաքացիական պայմանագրի» հանրահավաքի ժամանակ հայտարարեց վարչապետ Նիկոլ Փաշինյանը։
Նա շեշտեց, թե այսօր իրենց մեղադրում են նախկին բարքերը վերադարձնելու՝ վարչական ռեսուրսներն օգտագործելու համար, ապա նկատեց. - «Ով վարչական ռեսուրսով է եկել՝ խնդրում եմ՝ գնա։ Որովհետև դա մեզ համար անարգանք է։ Վարչական ռեսուրսով գալը և բերելն անարգանք է և՛ եկողի, և՛ բերողի նկատմամբ։ Մենք այդ անարգանքին մեզ չենք ենթարկի»,- ասաց նա։
Անդրադառնալով հանրահայտ ռեպեր Սնուփ Դոգի համերգին ու հնչող քննադատություններին՝ երկրի ղեկավարն ասաց, որ դա Հայաստանի անվան համար են անում, որ որևէ մեկը չմտածի, թե Հայաստանը չկա. - «Որևէ մեկը չմտածի, թե Հայաստանը ծնկի է եկել։ Հայաստանն ապրում է, զարգանում է, կա և լինելու»։
«Շատերը կամ քչերը, օգտվելով մեր կենտրոնացվածությունից Լեռնային Ղարաբաղի հարցի և Լեռնային Ղարաբաղի կարգավիճակի վրա, դա փորձել են օգտագործել որպես շեղող մանյովր Հայաստանի կարգավիճակը կասկածի տակ դնելու համար:
Ինչո՞ւ 2020թ․ նոյեմբերի 9-ի եռակողմ հայտարարության ստորագրումից հետո իրադրությունը չի կայունանում, որովհետև ոմանք չեն հասել իրենց նպատակին՝ ծնկի բերել Հայաստանի Հանրապետությունը, կասկածի տակ դնել անկախությունը, ինքնիշխանությունը և պետականությունը», - հավելեց նա։
