«Ազատություն». - Արձագանքելով վարչական ռեսուրսի կիրառման դեպքերին, վարչապետը երեկ ասաց, որ եթե այդպիսիք կան, դրա համար կա օրենսգիրք, կան իրավապահներ, ամեն մի դեպք պիտի արժանանա քննության։ Հայտնի է, որ դուք արդեն դիմել եք դատախազություն։ Արդյո՞ք կա արձագանք։
Իոաննիսյան. - Այո, մենք երկու հաղորդում արդեն ներկայացրել ենք դատախազություն՝ կապված «Քաղաքացիական պայմանագիր» կուսակցության հավաքներին վարչական ռեսուրսի չարաշահմամբ անձանց, մասնավորապես համայնքային և պետական կազմակերպությունների աշխատողներին (պոլիկլինիկաներ, դպրոցներ, մանկապարտեզներ) բերելու հետ։ Դեռևս դատախազությունից արձագանք չունենք։ Մեր հաղորդումները հիմնված են թե' մեր դիտորդների լսածի ու տեսածի վրա և թե' համացանցում հրապարակված տեսանյութերի վրա։ Մեր դիտորդները, օրինակ, տեսել են, թե ինչպես են 19-րդ պոլիկլինիկայի աշխատողներ իրար մեջ խոսում, ասում են՝ մենք տարիքով ենք, մեզ տնօրենը կթողնի, որ մի ժամ շուտ դուրս գանք։ Կամ 133 դպրոցի ղեկավարությունը իրար մեջ քննարկում էր, որ այ, ուր ա անձնակազմը, անձնակազմը չկա, մեր վրա վերևից խոսակցություն ա գալու։ Սրանք ակնհայտորեն խոսում են նրա մասին, որ վարչական ռեսուրսի չարաշահում կա։ Այստեղ իհարկե չեմ կարող չընդգծել, որ ողջունելի է ԿԳՄՍ նախարարության կողմից շրջաբերականը, որով որ խիստ զգուշացում է տրվում, որպեսզի նման երևույթներ չլինեն։ Բայց տպավորությունս այն է, որ քանի որ քաղաքապետարանի հանրակրթության վարչության պետը «Քաղաքացիական պայմանագրի» ցուցակում է և թեկնածու է, որ իր ազդեցությունը այստեղ բավականին մեծ է, ցավոք սրտի։
«Ազատություն». - Ընդհանուր արձագանքելով, գնահատական տալով՝ վարչապետը երեկ ասում էր, որ «Քաղաքացիական պայմանագիրը» չի կարող այդպիսի գործելակերպ ունենալ, քանի որ դա հակասում է կուսակցության էությանը և արժեքներին։ Ձեզ համոզո՞ւմ է այս պատասխանը։
Իոաննիսյան. - Ճիշտն ասած, համոզիչ չի։ Ընդ որում, դրա մասին խոսվում է Հանրային հեռուստատեսությամբ, որը ինքնին հանդիսացել է վարչական ռեսուրսի չարաշահման դրսևորում։ Մենք տեսել ենք, թե ինչպես է Հանրային հեռուստատեսությունը նախընտրական քարոզարշավը սկսելուց առաջ դեռևս ակտիվորեն Տիգրան Ավինյանի PR-ը անում։ Իրականում էս ինֆորմացիայի ծավալը այնքան է, որ հիմք է տալիս ենթադրելու, որ խնդիր ունենք համակարգային բնույթի, ոչ թե ինչ-որ էպիզոդիկ, կամ ինչ-որ մարդկանց սխալ դրսևորվելու արդյունք։ Չէ։ Ինչ վերաբերվում է իրավապահներին, տեսել ենք ժամանակներ, երբ որ իրավապահները չէին արձագանքում նման դեպքերին։ Վերջին անգամ, երբ որ Հայաստանում եղել են նման դեպքեր, իսկ դա 17 թվականն էր, իհարկե մասշտաբները լրիվ այլ էին։ Ես չեմ ասում, որ մենք հիմա ունենք վարչական ռեսուրսի այնպիսի չարաշահում, ինչպիսին որ 17 թվականին էր։ Չէ, դեռ հեռու ենք։ Էդ խնդրահարույց տենդենցը կա, դեպի էդ կողմ գնացող տենդենցը կա, բայց դեռ հեռու ենք։
«Ազատություն». - Հաջորդ փաստարկը, որ բերվում է, որ այդ հավաքները աշխատանքային ժամի ավարտին են արվում, և լինի մանկապարտեզի, դպրոցի աշխատակից, ինքը էդ պահին էլ գործի չէ։
Իոաննիսյան. - Այո, գործի չէ։ Բայց ամբողջ խնդիրն այն է, դա կապ չունի իրականում այս բանավեճի հետ, որովհետև շատ կարևոր է՝ ինքը գալիս է, որովհետև որպես քաղաքացի ուզում է գա՞, թե՞ որովհետև իրեն տնօրենը ասել է կգաս։ Եվ այն ինֆորմացիան, որը կա, այդ ողջ ինֆորմացիան ցույց է տալիս, որ շատ ու շատ դեպքերում հենց ղեկավարները համայնքային և պետական հիմնարկների հենց հրամայական ոճով ասել են, որ պետք է գաք այս հավաքներին։ Հավաքի մասնակիցների մեծ մասը աշխատում են համայնքային ու պետական կազմակերպություններում։ Հարց չի՞ առաջանում ինչի՞ ա տենց դիսբալանս։ Ենթադրենք պայմանական Նոր Նորքում բնակիչների մեծ մասը ՀՈԱԿ-ներում ու ՊՈԱԿ-ներում չե՞ն աշխատում։ Բա ո՞նց ա, որ ցույցի մասնակիցների մեծ մասը ՀՈԱԿ-ներից ու ՊՈԱԿ-ներից են։ Սա ևս փաստարկ ա, որը խոսում է նրա մասին, որ ՀՈԱԿ-ների ու ՊՈԱԿ-ների վրա ինչ-որ այլ ազդեցություն կա։
«Ազատություն». - Դրա պատասխանն էլ է հնչել, որ այսքան դպրոց ու մանկապարտեզ է կառուցվել, վերանորոգվել։ Արդյո՞ք այդ մարդիկ ինքնակամ չէին գա՝ իրենց համակրանքը, գուցե շնորհակալությունը հայտնելու։
Իոաննիսյան. - Դպրոցներն ու մանկապարտեզները կառուցվում են բնակիչների համար, և բնակիչները պիտի գան կամ չգան։
Հարցազրույցն ամբողջությամբ կարող եք դիտել այստեղ.
