Այսօր մեկնարկեց Երևանի ավագանու ընտրությունների քարոզարշավը։
Պետք է ընտրել այն ուժին, որի մանդատը կծառայի իշխանափոխությանը, քարոզարշավի առաջին օրը հայտարարեց «Ապրելու երկիր» կուսակցության քաղաքապետի թեկնածու Մանե Թանդիլյանը։
Լրագրողների հետ զրույցում, «Ազատության» հարցին ի պատասխան, Թանդիլյանը շեշտեց՝ իրենց քաղաքական ուժը չի ցանկանում առանձնացնել Երևանի խնդիրները Հայաստանի առջև ծառացած անվտանգային խնդիրներից, իսկ կուսակցության ուշադրության կենտրոնում Արցախն է լինելու։
Քաղաքապետի թեկնածուն նաև նշեց՝ 50+ չհավաքելու դեպքում չի միանա «Քաղաքացիական պայմանագրին»։
«Ազատության» հարցին, թե այլ ընդդիմադիր ուժերի, մասնավորապես, Հայկ Մարությանի առաջնորդած «Ազգային առաջընթացին» կմիանա՞, Թանդիլյանը չբացառեց։
Ընտրություններին առաջադրվել է 13 կուսակցություն և մեկ դաշինք։ 14 ուժերը տարբեր միջոցառումներ են ծրագրում օրվա ընթացքում։
Երևանի ավագանու ընտրությունները տեղի կունենան սեպտեմբերի 17-ին։
