Լեռնային Ղարաբաղում ստեղծված ծանր կացության հարցով այսօր համատեղ հայտարարություն են տարածել Հարավային Կովկասի հետ հարաբերությունների պատվիրակության նախագահ, Եվրախորհրդարանի պատգամավոր Մարինա Կալյուրանդը, Եվրախորհրդարանի Հայաստանի հարցով զեկուցող Անդրեյ Կովաչևը և Եվրախորհրդարանի Ադրբեջանի հարցով զեկուցող Ժելյանա Զովկոն:
Եվրոպացի օրենսդիրները խորապես անհանգստացած են Լեռնային Ղարաբաղում արագորեն վատթարացող մարդասիրական վիճակի և Ադրբեջանի կողմից Լաչինի միջանցքի շարունակական շրջափակման կապակցությամբ: Նրանք նշում են, որ Ադրբեջանի այդ գործելակերպը հակասում է 2020 թվականի նոյեմբերի 9-ի եռակողմ հայտարարությամբ ստանձնած պարտավորություններին և Արդարադատության միջազգային դատարանի 2023 թվականի փետրվարի 22-ին ընդունված, ապա հուլիսի 6-ին վերահաստատված իրավաբանորեն պարտադիր ուժ ունեցող որոշմանը:
Լեռնային Ղարաբաղի 120 հազար բնակիչները կանգնած են լուրջ մարդասիրական խնդրի առաջ:
Ուղերձի երեք հեղինակները նշում են, որ լիովին աջակցում են Եվրամիության բարձր ներկայացուցիչ Ժոզեպ Բորելի հուլիսի 26-ի հայտարարությանը և դատապարտում են մարդասիրական մատակարարումների շարունակական շրջափակումը:
Կալյուրանդը, Կովաչևը և Զովկոն ընդգծում են, որ Աղդամի ճանապարհով օգնություն տրամադրելու Ադրբեջանի առաջարկն առանձին հանգամանք է, ուստի Լաչինի միջանցքի հետ կապված պարտավորությունները պետք է հարգվեն։ Պարտադիր պետք է թույլ տալ մարդասիրական օգնության փոխադրումը, և այն խոչընդոտելը համարվում է միջազգային մարդասիրական օրենքի խախտում: Լրացուցիչ ուղիների բացումը խրախուսելի է, սակայն դա առանձին խնդիր է, որը պետք է փոխադարձաբար համաձայնեցվի Բաքվի և Ստեփանակերտի ուղիղ բանակցությունների միջոցով:
«Մենք լիովին աջակցում ենք տասնամյակներ շարունակվող հակամարտության կայուն և երկարաժամկետ լուծում գտնելու Եվրոպական խորհրդի նախագահ Շառլ Միշելի դիվանագիտական ջանքերին: 2023 թվականի հուլիսի 15-ին Բրյուսելում կայացած վերջին հանդիպմանը երկու կողմերը պայմանավորվել են դյուրացնել մարդասիրական օգնության հասանելիությունը տարածաշրջան՝ մարդկային տառապանքը մեղմելու նպատակով: Ցավոք, շարունակվող շրջափակումը հակասում է խաղաղ բանակցությունների նպատակին և այդքան անհրաժեշտ վստահության ամրապնդման ջանքերին», - նշում են երեք օրենսդիրները:
Նրանք հիշեցնում են Եվրախորհրդարանի 2023 մարտի 15-ի կոչը Խորհրդին այն մասին, որ արդարադատության միջազգային դատարանի 2023 թվականի փետրվարի 22-ի որոշումն անհապաղ չկատարելու դեպքում թիրախավորված պատժամիջոցներ սահմանել Ադրբեջանի կառավարության պաշտոնյաներինկատմամբ:
«Հիշում ենք նաև Եվրոպական խորհրդարանի 2023 թվականի հունիսի 13-ի լիագումար նիստը, որի ընթացքում ԵՄ բարձր ներկայացուցիչը
պարտավորվել է Խորհրդում արծարծել նման պատժամիջոցների կիրառման տարբերակը»,- նշել են եվրոպացի երեք օրենսդիրները:
Կալյուրանդը, Կովաչևը և Զովկոն կրկնել են կոչը Բաքվին՝ անհապաղ դադարեցնել Լեռնային Ղարաբաղի շրջափակումը, հավատարիմ մնալ միջազգային նորմերին ու պարտավորություններին՝ հումանիտար աղետը կանխելու համար:
