Վրաստանի արտաքին գործերի նախարար Իլյա Դարչիաշվիլին Միացյալ Նահանգների պետական քարտուղար Էնթոնի Բլինքենին հասցեագրված նամակում գրել է, թե վրացի դատավորների նկատմամբ չհիմնավորված պատժամիջոցների սահմանումը կարող է վնաս հասցնել երկու երկրների բարեկամական հարաբերություններին:
Երեկ Միացյալ Նահանգները վիզաների տրամադրման սահմանափակումների որոշում է կայացրել Վրաստանի արրդարադատության բարձրագույն խորհրդի չորս անդամների նկատմամբ: Որոշումը բացատրվում է այդ դատավորների ենթադրյալ կոռուպցիոն գործողություններով:
Ցուցակում հայտնվել են Միխայիլ Չինչալաձեն, Լևան Մուրուսիձեն, Իրակլի Շենգելիան և Վալերիան Ցերցվաձեն:
Ըստ պետական քարտուղար Բլինքենի հայտարարության, «այդ պաշտոնյաները չարաշահել են իրենց լիազորությունները և դրանով խարխլել են օրենքի գերակայությունն ու հասարակության վստահությունը Վրաստանի դատական համակարգի նկատմամբ»:
Վաշինգտոնն արգելելու է ոչ միայն նշված չորս անձանց, այլև նրանց մերձավոր ազգականների մուտքը Միացյալ Նահանգներ:
«Բացարձակ անհասկանալի և անընդունելի է ԱՄՆ-ի Պետական դեպարտամենտի կողմից դատավորների հանդեպ անհիմն մեղադրանք ներկայացնելու որոշումը: Հուսով ենք, որ Պետական դեպարտամենտը համապատասխան ապացույցներ կներկայացնի կամ կվերանայի այդ որոշումը: Հակառակ դեպքում Վրաստանի պետությունը և ժողովուրդը դա կդիտեն որպես ինքնիշխան պետության անկախ դատարանի վրա ճնշման բանեցում և դրա գործունեությանը կոպիտ միջամտություն, ինչը վնաս կհասցնի Վրաստանի և ԱՄՆ-ի բազմամյա բարեկամական հարաբերություններին», - ասվում է Բլինքենին հասցեագրված Դարչիաշվիլիի նամակում:
