Թուրքիայում, եթե ընդդիմությունը գա իշխանության, հնարավոր է նախապայմանները, որ դրվում էին Հայաստանի դեմ, ավելի ճկուն, ավելի փափուկ լինեն, «Ազատության» հետ զրույցում ասաց արևելագետ, թուրքագետ Ռուբեն Սաֆրասատյանը։
Ընգծելով, որ փետրվարի 6-ի ավերիչ երկրաշարժից հետո Թուրքիան մեծ կորուստն է կրել, լայնածավալ վերականգնողական աշխատանքներ են հարկավոր, պաշտոնական հաշվարկներով ծախսերը կկազմեն 100 մլրդ դոլար և նույնիսկ ավելի՝ Սաֆրաստյանը նկատեց՝ ակնհայտ է, որ Թուրքիան իր ուժերով չի կարողանա այդ հետևանքները հաղթահարել և անհրաժեշտ կլինի արտասահմանից կապիտալի ներդրում։
Ըստ թուրքագետի՝ դա կլինի հիմնականում ամերիկյան կապիտալը և կնշանակի, որ Միացյալ Նահանգների ազդեցությունը Թուրքիայի վրա կուժեղանա։
«Մյուս կողմից, ընդդիմությունն, ինչպես արդեն ակնհայտ է, վայելում է Արևմուտքի և ԱՄՆ-ի բարյացակամ վերաբերմունքը, և եթե այս հանգամանքները մենք ի մի բերենք, ապա, իմ կարծիքով, եթե ընդդիմությունը գա իշխանության, ապա սկզբունքորեն չփոխելով մոտեցումը Հայաստանի հետ հարաբերությունների կարգավորման առումով, այսինքն՝ այն նախապայմանները, որ դրվում են Թուրքիայի կողմից, պահպանելով այդ նախապայմանները, այն գինը, որ պետք է Հայաստանը վճարի, կարող է այդ գնի մեջ որոշակի փոփոխություններ լինեն, եթե փոխաբերական առումով ասենք, ավելի ճկուն լինի, ավելի փափուկ լինի, ավելի քիչ գին պահանջի Թուրքիան Հայաստանից», - եզրափակեց Սաֆրաստյանը։
Թուրքիայի խորհրդարանական և նախագահական ընտրությունները տեղի կունենան մայիսի 14-ին։ Ընդդիմության միասնական թեկնածու Քեմալ Քըլըչդարօղլուն որոշակի առավելություն ունի գործող նախագահ Էրդողանի նկատմամբ։
Ռուբեն Սաֆրաստյանի հետ հարցազրույցն ամբողջությամբ կարող եք դիտել ստորև․