Ռուսաստանի, Թուրքիայի, Սիրիայի և Իրանի փոխարտգործնախարարները հաջորդ շաբաթ կհանդիպեն Մոսկվայում: Այս մասին հայտարարել է Թուրքիայի արտգործնախարար Մևլութ Չավուշօղլուն իրանցի պաշտոնակցի հետ բանակցություններից առաջ։
Թուրքիայի դիվանագիտության ղեկավարի խոսքով՝ Հոսեյն Ամիր-Աբդոլլահիանը ցանկանում է միանալ Սիրիայի հարցով Թուրքիայի, Սիրիայի և Ռուսաստանի միջև բանակցություններին, և Անկարան ուրախությամբ համաձայնել է։
Մոսկվան միջնորդի դեր է ստանձնել դիվանագիտական կապերը խզած Դամասկոսի և Անկարայի հարաբերությունների կարգավորման գործընթացում ու անցած դեկտեմբերին հարևան երկրների պաշտպանության նախարարների հանդիպում էր նախաձեռնել՝ նպատակ ունենալով հաջորդ հանդիպումները կազմակերպել արտգործնախարարների և, ի վերջո, նախագահների՝ Ռեջեփ Էրդողանի և Բաշար Ասադի միջև:
Սիրիական ավելի քան մեկ տասնամյակ շարունակվող հակամարտությունում Մոսկվան ու Թեհրանն աջակցում են Ասադի կառավարությանը, Անկարան՝ սիրիական ընդդիմադիր խմբավորումներին:
