Ուկրաինայի շուրջ Արևմուտքի հետ բանակցությունների վերաբերյալ Մոսկվայից հնչում են իրարամերժ հայատարություններ։
«Արևմտյան երկրների հետ բանակցություններն իմաստ ունեն Ուկրաինայում տիրող իրավիճակի կարգավորման համար», - ասել է Ռուսաստանի նախագահի մամուլի քարտուղարը։
«Կիևի հետ աշխատելու նախկին փորձը ցույց է տալիս, որ առանց Արևմուտքի հետ խոսելու Կիևի դիրքորոշումը շատ-շատ փոփոխական է։ Ուստի, իհարկե, այսպես ձևակերպենք, Արևմուտքի հետ շփումն այս հարցով կարող է օգտակար լինել։ Քանի որ այնտեղից բխող հրահանգները Կիևը շատ բծախնդիր է իրականացնում», - հավելել է Դմիտրի Պեսկովը։
Մինչդեռ այսօր ավելի վաղ փոխարտգործնախարար Սերգեյ Ռյաբկովը հայտարարել էր, որ Ռուսաստանը «ուղղակի խոսելու բան չունի» ԱՄՆ-ի հետ Ուկրաինայի հարցում՝ «արմատապես հակադիր դիրքորոշումների» պատճառով։
Քանի դեռ բանակցությունները Մոսկվայի և Կիևի միջև չեն վերսկսվում , Մոսկվան շարունակում է ռմբակոծել ուկրաինական տարածքը, այդ թվում Զապորոզիեի շրջանը, որտեղ տեղակայված է Եվրոպայի ամենամեծ ատոմակայանը։
Ատոմային էներգիայի միջազգային գործակալության կառավարիչների խորհուրդը այսօր բանաձև է ընդունել, որով պահանջում է Մոսկվայից դուրս բերել իր ռազմական և քաղաքացիական անձնակազմը Զապորոժիեի ատոմակայանից և դադարեցնել ամբողջ գործունեությունը ուկրաինական միջուկային օբյեկտներում:
Ռուսական կողմը բանաձևն անվանել է «ոչ պրոֆեսիոնալ, գործակալության լիազորություններից դուրս և փաստացի սխալներ պարունակող»։
Ավելի քան10 միլիոն ուկրաինացիներ մնացել են առանց էլեկտրականության
Միաժամանակ, ռուսական ուժերը շարունակում են ռմբակոծել ուկրաինական բնակավայրերը և էներգետիկ ենթակառուցվածքները, ներառյալ Զապորոզժիեի մարզը։ Մարզի Վոլնյանսկ քաղաքում ևս երկու մարդու դի են դուրս բերել նախօրեին հրթիռակոծված բնակելի շենքի փլատակների տակից։ Զոհերի թիվը միայն այս քաղաքում վերջին հրթիռակոծության հետևանքով հասել է 9-ի։
Ուկրաինայի գլխավոր շտաբի հաղորդմամբ, վերջին վեց օրվա ընթացքում ռուսական ուժերը գրեթե 150 հրթիռային հարված են հասցրել Ուկրաինային։ Ավելի քան10 միլիոն ուկրաինացիներ մնացել են առանց էլեկտրականության։
Զելենսկին կրկին դիմել է արևմտյան երկրներին՝ խնդրելով օգնել Ուկրաինային պաշտպանել երկինքը ռուսական հրթիռային հարվածներից․ - «Կրկին ու կրկին մենք կրկնում ենք մեր գործընկերներին, որ միայն ուկրաինական երկնքի ամբողջական պաշտպանությունը կփրկի ինչպես Ուկրաինային, այնպես էլ Եվրոպային ռուսական ագրեսիայի բազմաթիվ հնարավոր սրացումներից և միանշանակ կխրախուսի Ռուսաստանին իսկապես դադարեցնել պատերազմը»։
Զելենսկին կրկին ասում է, թե պետք չէ հավատալ կեղծ բանակցությունների մասին ռուսական պրոպագանդային, և պնդում, որ միայն ուկարինական երկինքը փակելը կստիպի Ռուսատսանին դադարեցնել պատերազմը և գնալ իրական խաղաղության։
Ուկրաինայի նախագահի վարչակազմի ներկայացուցիչ Միխայիլ Պոդոլյակը «Ազատության» ռուսական ծառայության եթերում պարզաբանել է, թե ինչ է ուզում Կիևը, երբ այսօր ասում է օգնեք մեզ փակել մեր երկինքը․ - «Մենք ասում ենք՝ մեր ժողովուրդը պատրաստ է ամեն ինչ ինքնություն անել, դուք մեզ միայն հակահրթիռային և հակաօդային պաշտպանության համակարգերի որոշակի հավելյալ ծավալ տվեք»։
Պոդոլյակը ասում է, թե հոկտեմբերի 10-ից ռուսական կողմը փոխել է պատերազմի բնույթը. - «Եկավ Սուրովիկին անունով սուբյեկտը, որը բացարձակապես «արդյունավետ» կռվեց Սիրիայում՝ օգտագործելով այն պահը, երբ ապստամբները չունեին հակաօդային պաշտպանություն։ Նա ուղղակի օդից ոչնչացրեց նրանց հրթիռներով և ինքնաթիռներով։ Այս սուբյեկտը, իհարկե, խորհրդակցեց պարոն Պուտինի հետ, և նրանք որոշեցին հարձակվել բացառապես քաղաքացիական թիրախների վրա, Ուկրաինայի խոշոր քաղաքների և էներգետիկ օբյեկտների վրա»։
Պատերազմի մեկնարկից ի վեր Միացյալ Նահանգները և դաշնակիցները հսկայական ռազմական և ֆինանսական օգնություն են ցուցաբերում են Ուկրաինային, ինչը թույլ է տվել ուկրաինական ուժերին ստիպել ռուսներին նահանջել Խարկովի և Խերսոնի մարզերից։ Սակայն Կիևը ավելին է ուզում։
Միաժամանակ ԱՄՆ Կոնգրեսի Ներկայացուցիչների պալատում հանրապետական մի խումբ օրենսդիրներ բանաձև են պատրաստել՝ Ուկրաինային հատկացված միջոցները վերանայելու համար: Բանաձևը կներկայացվի համապատասխան հանձնաժողովին, որի անդամները երկու շաբաթ ժամանակ կունենան կամ մերժելու նախաձեռնությունը, կամ հաստատելու դրա քվեարկությունը Ներկայացուցիչների պալատում։
