Պրահայի քառակողմ հանդիպման արդյունքները Բաքուն որպես առաջընթաց է ընկալում խաղաղության պայմանագրի ստորագրման ուղղությամբ, հայտարարել է Ադրբեջանի դիվանագիտական գերատեսչությունն՝ ամփոփելով Աստանայում այսօր Ռուսաստանի, Հայաստանի և Ադրբեջանի արտգործնախարարների հանդիպումը։
Հաղորդագրության համաձայն, նախարար Ջեյհուն Բայրամովը հիշեցրել է, որ Ժնևում հոկտեմբերի 2-ին «Ադրբեջանը Հայաստանին է ներկայացրել խաղաղության պայմանագրի հիմնական տարրերը» և սպասում է Հայաստանի պատասխանին:
Ռուսաստանի և Հայաստանի արտգործնախարարների մասնակցությամբ եռակողմ հանդիպմանն Ադրբեջանի դիվանագիտության ղեկավարը Հայաստանին կոչ է արել գործնական աշխատանքներ սկսել նաև հաղորդակցությունների բացման ուղղությամբ։
«Նախարարը կարևորել է եռակողմ հայտարարությունների համակարգային իրականացումը, ընդգծել է հայտարարության՝ Հայաստանի չիրականացրած կետերի իրականացման անհրաժեշտությունն, այդ թվում՝ այն, որ Հայաստանը Ադրբեջանի տարածքում ականներ է տեղադրել, և այն, որ Հայաստանը չի տրամադրում ականապատ դաշտերի քարտեզներն ամբողջ ծավալով, լրջագույն խնդիր է» ,- ասվում է ադրբեջանական կողմի հաղորդագրությունում։
Ադրբեջանի դիվանագիտական գերատեսչությունը նաև տեղեկացնում է, որ Լավրով-Միրզոյան-Բայրամով հանդիպմանը մտքեր են փոխանակվել նաև «կարգավորման գործընթացին նպաստող այլ հումանիտար հարցերի շուրջ»։
