Առհասարակ այդ տեսակ պահեստներն, ինչպիսին «Սուրմալու»-ինն է, պիտի նորմավորվեն և քաղաքից դուրս տեղակայվեն, «Ազատության» հետ զրույցում նման կարծիք հայտնեց ճարտարապետ Տիգրան Գալստյանը՝ միաժամանակ շեշտելով՝ վաճառքի մասն էլ պետք է հատուկ լիցենզիայիով իրականացվի։
Ճարտարապետը դեմ է, հետևանքների վերացման կտրուկ միջոցներին՝ շուկան փակելու կոչերին։ Կարել է կանոնակարգել, անվտանգության նորմերն ապահովել, վերահսկել, «Սուրմալու» տոնավաճառն էլ գործածել ժամանակակից նորմերին համապատասխան, ասաց Գալստյանը։
Տիգրան Գալստյանի հետ հարցազրույցից մի հատված ներկայացնում ենք ստորև․
«Ազատություն»․ - Ինքնին փաստը, որ հրավառ նյութերի պահեստը և խանութները տեղակայվել են քաղաքի կենտրոնում, բավական բանուկ մասում, ինչպե՞ս եք գնահատում։
Գալստյան․ - Իհարկե, անհասկանելի է, թե ինչպես կարելի էր այդպիսի դյուրավառ նյութերի պահեստը տեղակայել քաղաքի այդպիսի բանուկ հատվածում, որտեղ օրվա ընթացքում, ախատանքային գրեթե բոլոր ժամերին, հսկայական քանակությամբ մարդ կա և ռիսկայնություն կար միշտ էլ դրանց պայթելու և զոհերի քանակն այդ դեպքում մեծ կլիներ, ինչպես և եղավ։ Առհասարակ այդ տեսակ պահեստները պիտի նորմավորվեն և քաղաքից դուրս տեղակայվեն, ասենք՝ պահեստային մասը, իսկ վաճառքի մասը պիտի հատուկ լիցենզիայիով իրականացվի, հատուկ խանութներում և չի կարելի, օրինակ, փողոցային հատվածներում, գիտենք ամանորյա շրջանում մեծ վաճառք է սկսվում և կամայական վայրում կամ խանութում այդպիսի պայթուցիկ նյութեր են վաճառվում։
«Ազատություն»․ - Արդեն հետևանքների վերացման շատ կտրուկ պահանջներ են հնչում, ընդհուպ փակել «Սուրմալու» տոնավաճառը։
Գալստյան․ - Իհարկե, կարելի է այդպիսի ծայրահեղ քայելրի գնալ, նույնիսկ պահանջ կա որոշակի քաղաքացիների կողմից, որ հրավառությունն արգելվի, ես առանձնապես հրավառության սիրահար չեմ, բայց այդպիսի կտրուկ միջոցների գնալուն դեմ են, որովհետև կարել է կանոնակարգել, անվտանգության նորմերն ապահովել, վերահսկել և օգտագործե։ Նույն «Սուրմալու» շուկան, կարող է գործածվել ժամանակակից նորմերին համապատասխան և վերահսկվել, գիտենք, որ այնտեղ բազմաթիվ մարդիկ են աշխատում, այդ մարդկանց փողոց հանելն ու գործազուրկ սարքելը որևէ լավ բանի մասին չի խոսում։
«Ազատություն»․ - Այսինքն՝ խստացնել կանոնները և ոչ կացնահարությամբ արգելել ամեն ինչ։
Գալստյան․ - Միանշանակ, կամայական ոլորտում պետք է եղած նորմերն ընթացքում բարելավել, իսկ ինչն ավելի կարաևոր է, նորմաները պետք է պատշաճ վերահսկվեն և նաև դրանց իրականցումը վերահսկվի։
«Ազատություն»․ - Ընդհանրապես այս իրավիճակը կգնահատեիք որպես բյուջեի պակասի հետևանք, որ մեծ հիմնարկ չունի տեսչական մարմինը, գուցե կոռուպցիոն ռիսկեր եք տեսնում, կամ ուղղակի ոչ պրոֆեսիոնալ մոտեցում է։
Հարցազրույցն ամբողջությամբ կարող եք դիտել ստորև․
