Մոսկվան դեռ չի տեսել Լեռնային Ղարաբաղում ռուսական խաղաղապահ առաքելության մանրամասները հստակեցնելուն առնչվող Հայաստանի վարչապետի առաջարկները, այսօր լրագրողներին ասել է Ռուսաստանի արտգործնախարարը։
Փաշինյանը երեկ կառավարության նիստում մեղադրել էր ռուս խաղաղապահներին, թե պատերազմից հետո նրանց ներկայությամբ ու թողտվությամբ են տեղի ունեցել Արցախում մի շարք միջադեպեր, Խծաբերդ և Հին Թաղեր գյուղերի գրավումը, հայ զինծառայողների գերեվարումը, հրադադարի խախտումները։
Ռուսաստանի արտգործնախարարը, մեկնաբանելով Փաշինյանի հայտարարությունը, ասել է, թե խաղաղապահների գործունեության հետ կապված առաջարկներ, որ ցանկանում է քննարկել Փաշինյանը, չեն տեսել։
«Կողմերից յուրաքանչյուրը, որի պայմանավորվածությունները ձեռք են բերվել Ռուսաստանի, Ադրբեջանի նախագահների և Հայաստանի վարչապետի կողմից, իհարկե, իրավունք ունի առաջարկել լրացուցիչ նախաձեռնություններ»,- ասել է Լավրովը:
Լավրովի խոսքերին Հայաստանից հրապարակային արձագանք դեռ չկա։ Այս պահին Ռուսաստանի դեմ տրամադրվածություն չկա, հստակեցնում է իշխանական պատգամավոր Վիգեն Խաչատրյանը։ Փաշինյանի մեղադրանքների հասցեատերը, ըստ նրա, խաղաղապահներն են, ոչ թե Ռուսաստանը։
«Մենք ուզում ենք, որ Ռուսաստանն իր պարտավորությունները կատարի և ըստ այդմ խաղաղապահների գնահատականը տա` արդյոք խաղաղապահների վարքագիծը բխում է Ռուսաստանի բուն քաղաքականությունից, թե՞ հակասություն կա այնտեղ», - ասաց նա:
Սեթևեթանքների ժամանակն անցել է, Փաշինյանն անկեղծորեն վերլուծում է իրավիճակն ու լուծումներ առաջարկում, համոզված է «Քաղաքացիական պայմանագրի» պատգամավորը։ Ի՞նչ լուծումներ է առաջարկում, արդյոք Ռուսաստանին այլընտրանք է փնտրում, երբ ասում է՝ «եթե ԼՂ շփման գծի անվտանգությունը չի ապահովվում, պետք է մտածել լրացուցիչ՝ միջազգային մեխանիզմների մասին»։ Փաշինյանի թիմակիցն ուղիղ չպատասխանեց «Ազատության» հարցին։ Հորդորեց սպասել, ասաց` քաղաքականության մեջ ոչինչ չի բացառվում:
«Ցանկացած իրավիճակ միշտ ունի ելք, իհարկե, լուծումներ կան, ինչո՞ւ չկան, կան, բազմաթիվ լուծումներ կան, որը կընտրվի, որը կիրագործվի, կապված է Ռուսաստանի պատասխանից, քայլերից, կտեսնենք` Ռուսաստանն ինչ շարունակականություն է դրսևորում, ըստ այդմ լուծումները կարող են փոխվել: Քաղաքականությունը շատ լավ սկզբունքներ ունի, որ ոչ մի բան երբեք չի կարելի բացառել», - ասաց Վիգեն Քոչարյանը:
Փաշինյանի վերջին հայտարարությունը հերթական փորձն էր` մեղավորներ ու պատասխանատուներ կարգել. ընդդիմադիր պատգամավոր
Փաշինյանի վերջին հայտարարությունը հերթական փորձն էր` մեղավորներ ու պատասխանատուներ կարգել Արցախում ստեղծված իրավիճակի համար, կարծում է «Հայաստան» խմբակցության պատգամավոր Գեղամ Մանուկյանը։
«Իհարկե, ռուսական խաղաղապահ զորակազմի դերակատարությունը, պատասխանատվությունը, լիակատար պատասխանատվությունը այն, ինչ որ կատարվել է Արցախում, նկատի ունեմ և Փառուխի դեպքը, և դրանից առաջ, մեծամասամբ կա, բայց պատասխանատվությունն առաջին հերթին ՀՀ-ն է կրում և Հայաստանի իշխանությունները», - շեշտեց նա:
Իսկ ինչո՞ւ Փաշինյանն ավելի վաղ չէր քննարկել խաղաղապահ զորախմբի առաքելության մանրամասները, հարցնում է ընդդիմադիր պատգամավորն ու հիշեցնում Լավրովի այսօրվա հայտարարությունը. «Պարզ է դառնում մի բան` Նիկոլ Փաշինյանը 2020-ի նոյեմբերի 9-ին չմտածված, հապշտապ, առանց խորհրդակցությունների ստորագրել է մի փաստաթղթի տակ, դրա հետևանքները չհասկանալով, չմտածելով, չծրագրելով հետագա գործողությունները, նույն խաղաղապահների մանդատի հետ կապված, նրանց իրավասությունների, լիազորությունների հետ կապված: Առաջին անգամ չէ` օտար երկրի ներկայացուցիչը հրապարակային հերքում է հայկական կողմի հայտարարությունները: Դեռ ավելին` խոսքը կոնկրետ Լավրովի մասին է»:
Իսկ ո՞րն է ստեղծված իրավիճակից ելքը, երբ խաղաղապահ զորախմբի պատասխանտվության տակ գտնվող շփման գծում պարբերաբար լարված է։ Գեղամ Մանուկյանի կարծիքով` իրավիճաակը կփոխվի, եթե փոխվի գործող իշխանությունը` հնարավոր է բանակցել ու սրբագրել եղածը։
