Կրեմլը հայտնել է, որ Ղարաբաղում տեղակայված ռուսաստանցի խաղաղապահների վերաբերյալ Հայաստանի ունեցած հարցերը հնարավոր է պարզաբանել երկխոսության միջոցով:
Այդպես նախագահ Վլադիմիր Պուտինի խոսնակ Դմիտրի Պեսկովն արձագանքել է Ղարաբաղում ռուսաստանցի խաղաղապահների ներկայության և գործունեության վերաբերյալ Հայաստանի վարչապետ Նիկոլ Փաշինյանի մեկնաբանություններին:
Ըստ Կրեմլի խոսնակի, կան եռակողմ փաստաթղթեր, որոնք ելակետ են, և կարևորն այդ փաստաթղթերով կողմերի ստանձնած պարտավորությունների կատարումն է:
«Եթե կան հարցեր, ապա անկասկած պետք է տալ դրանց պատասխանները: Հայկական կողմի հետ մեր սերտ կապերը, որոնք առկա են ամենատարբեր մակարդակներում, թույլ կտան պարզաբանել այդ հարցերը»,- նշել է Դմիտրի Պեսկովը:
Վարչապետ Նիկոլ Փաշինյանն այսօր կառավարության նիստի ժամանակ անընդունելի համարեց խաղաղապահների ներկայությամբ շփման գծի երկայնքով հրադադարի ռեժիմի շարունակական և ահագնացող խախտումները՝ խիստ անհրաժեշտ համարելով Լեռնային Ղարաբաղում խաղաղապահ օպերացիայի մանրամասների ճշգրտումը։
Փաշինյանը խոստովանեց՝ սա անհրաժեշտ է եղել ի սկզբանե, բայց գործընթացին խոչընդոտել է Ադրբեջանը՝ հրաժարվելով ստորագրել Լեռնային Ղարաբաղում խաղաղապահ զորախմբի գործունեության մանդատը։
Ռուս խաղաղապահները Լեռնային Ղարաբաղում են՝ 2020-ի նոյեմբերի 9-ի եռակողմ հայտարարության շրջանակներում: Համաձայնագրով՝ զորակազմը տեղակայվել է 5 տարի ժամկետով, որը ևս հինգ տարով կարող է երկարաձգվել, եթե կողմերից որևէ մեկը ժամկետի ավարտին չպահանջի, որ առաքելությունը դուրս բերվի Ղարաբաղից։ Բաքուն սակայն պարբերաբար հայտարարում է, որ Ղարաբաղը Ադրբեջանի տարածքն է, իսկ ռուս խաղաղապահներն այնտեղ տեղակայվել են ժամանակավոր։
