Ոռոգման ջրի պահանջով այսօր Գետք ու Ղարիբջանյան գյուղերի բնակիչները փակել էին Գյումրի - Արմավիր մայրուղին: Ճանապարհը որոշ ժամանակ անց բացել էին, բայց կրքերը չէին հանդարտվում։
Բերքը դաշտում վառվում է, բողոքում էին գյուղացիները իրենց հետ բանակցելու եկած Ախուրյան խոշորացված համայնքի ղեկավարի տեղակալին:
Երկու գյուղերի մոտ 200 հեկտար տարածք, ինչպես գյուղացիներն են ասում, չվերահսկվող ջրերով են ոռոգել տասնամյակներով: Այսինքն՝ գյուղացին չի վճարում ոռոգման համար, Ջրօգտագործողների ընկերությունն էլ սպասարկում չի իրականացնում: Չվերահսկվող ջուրը Կառնուտի ջրամբարից է գալիս և մինչև Ազատանի հողատարածքները չջրվեն ավելցուկ ջուրը Գետք ու Ղարիբջանյան չի հասնում: Ոռոգման ջուրը գյուղերի միջև կռվի պատճառ է միշտ եղել, ասում է ղարիբջանյանցի Հայկ Գևորգյանը՝ ցույց տալով դաշտում չորացած բերքը:
«Ազատան համայնքից չեն թողնում, որ ջուր գա մեզ, միշտ էլ էդ նույն խնդիրը եղել է, կա ու կմնա: [Նախորդ տարիներին] իրանք ջրել պրծել են, նոր ջուրը բրախել են մեզ, ջուրը թողել են, որ մենք ջրենք, իրանք հիմա արդեն 4-րդ ջուր կջրեն, մենք հլը առաջինը չենք ջրել: Բույսի վիճակը տեսնում եք ինչ է, ու մենք վարկեր, պարտքեր, ընտանիք կպահենք, երեխա կպահենք», - ասաց Գևորգյանը:
Երիտասարդ գյուղատնտեսն ասում է, որ խնդիրը կլուծվի, եթե վերականգնվի գյուղին ոռոգման ջուր մատակարարող պոմպակայանը. - «Ախուրյան գետից նասոսով էն ժամանակ ջուրը հանել են մինչև էս հողերն էլ են ոռոգել, սաղ ոռոգովի է եղել, քանդվել է ու վերջ, էլ չի սարքվել, ամեն տարի ասում են, որ պիտի սարքվի ու չենք սաքում»:
Հիասթափված է. եթե ոռոգման ջրի հարցը չլուծվի, Գևորգյանն ասում է, հող էլ չի մշակի. - «Հողերը կթողնենք, կգնանք Ռուսաստան: Սենց չի լինի, պետությունը մեզ պիտի նորմալ նայի, որ մենք կարողանանք գյուղատնտեսությամբ զբաղվել»:
Մանվել Սերոբյանն էլ որդու հետ կարտոֆիլի, կաղամբի ու ծաղկակաղամբի դաշտերն է ցույց տալիս: Ասում է՝ բերքն արդեն 3-4 անգամ պետք է ջրած լինեին, բայց մեկ անգամ էլ չեն ոռոգել. - «3-րդ բերան պիտի ջրվեր, բայց մի բերան էլ չեմ ջրել, ջուր չի տեսել ընդհանրապես»:
Ծաղկակաղամբն արդեն շուկայում պետք է վաճառեին, այնինչ բերքը դաշտում չորանում է. - «2 միլիոնի էս սերմից առել եմ, էն էլ բանկով, փողը բանկից եմ վերցրել, հիմա ես խոստացել եմ, որ աշունը էդ մարդկանց փողը տամ, ես որտեղի՞ց տամ, որ բերք չկա»:
Գյուղացիների հետ հանդիպման եկավ Շիրակի մարզպետարանի գյուղվարչության պետը, վեճն ու կռիվը տեղափոխվեց Ղարիբջանյանին համայնքապետարան, ներկա էր նաև «Շիրակ ՋՕ»-ի տնօրենի տեղակալը: Մանվել Նահապետյանն ասաց՝ քանի որ համայնքը ՋՕ-ն չի սպասարկում, ջուր էլ, բնականաբար, տալ չեն կարող:
«Շիրակ ՋՕ»-ն Ղարիբջանյան համայնքի հետ պայմանագիր չունի, Ղարիբջանյան համայնքը «Շիրակ ՋՕ»-ի անդամ չէ, բնականաբար, «Շիրակ ՋՕ»-ն չի կանխատեսել, չի պլանավորել ոչ մի լիտր ջուր Ղարիբջանյան համայնքի համար ու հնարավորություն չունի էդ ջուրը տալու», - ասաց Նահապետյանը:
Շիրակի մարզպետարանի գյուղվարչության պետ Ռոման Համայակյանն ասաց՝ խնդիրը կլուծվի եթե, համայնքները ոռոգման համակարգ ունենան: Հարցը փորձելու են սուբվենցիոն ծրագրով լուծել:
«Սուբվենցիոն ծրագրերը որոշակի ոռոգման համակարգերի հարց կարողանան լուծել, որը հնարավորություն կստեղծի նաև անդամակցելու «Շիրակ ջրօգտագործողների» ընկերությանը ու էս իրավիճակում գոնե կկարողանան ջուր ստանալ: Էդ հատվածում, որտեղ բնակիչները նշում են, ոռոգման համակարգ չկա, չի էլ եղել», - նշեց Համայակյանը:
Ջերմաստիճանի կտրուկ բարձրացման պատճառով ոռոգման ջրի պահանջարկը մեծացել է, ասում մարզի գլխավոր գյուղատնտեսը: Թեև մարզային պաշտոնյաները վստահեցնում են, որ մարզը ոռոգման ջրի խնդիր չունի, բայց բողոքի ակցիաների պակաս չկա։ Շաբաթվա սկզբին էլ ճանապարհ էին փակել ախուրիկցիները։ Բողոքի ակցիայից հետո այս գյուղը ջուր ստացավ։
