«Հիսուս Քրիստոս» մոնումենտալ արձանի տեղադրման տեղադիրքի ընտրության վերաբերյալ Շրջակա միջավայրի նախարարություն «Գագիկ Ծառուկյան» բարեգործական հիմնադրամի կողմից որևէ փաստաթուղթ դեռ չի ստացվել։ Այս մասին հայտնում է նախարարությունը` հավելյալ տեղեկացնելով նաև, որ հիմնադրամի կողմից արձանի շինարարությունն այս պահին կասեցված է:
«Դրանք կմեկնարկեն միայն պատկան մարմինների կողմից շինարարական աշխատանքները սկսելու համար համապատասխան մասնագիտական և փորձաքննական եզրակացություններն ու թույլտվությունները ստանալուց հետո», - ասված է ՇՄՆ-ի հաղորդագրության մեջ։
Նախագծի վերաբերյալ Շրջակա միջավայրի նախարարությունը մասնագիտական եզրակացություն կտա համապատասխան փաստաթղթերը ստանալուց հետո։
Հատիս լեռը ընդգրկված է ՀՀ բնության հուշարձանների ցանկում։
Հուլիսի 7-ի կառավարության նիստի ժամանակ վարչապետ Նիկոլ Փաշինյանը տեղեկացրել էր, որ «Մուլտի գրուպ» կոնցեռնի նախագահը Հիսուս Քրիստոսի մեծ արձան կառուցելու նախաձեռնության վերաբերյալ համապատասխան փաստաթղթերը ներկայացրել է կառավարություն, կառավարության մարմինները պետք է քննարկեն և որոշում կայացնեն։ Վարչապետ Փաշինյանը ազդարարել էր նաև` փրկչի արձանի նախագիծը նախնական դրական են գնահատում:
Ավելի վաղ` նախագծի հանդիսավոր հիմնարկեքի հաջորդ օրը, ԿԳՄՍՆ-ն անընդունելի էր համարել «Հիսուս Քրիստոս» արձանի գաղափարը, միևնույն ժամանակ պահանջել դադարեցնել ցանկացած գործունեություն հնավայր-ամրոցի տարածքում մինչ սահմանված կարգով նախագծի ներկայացումը և մասնագիտական ուսումնասիրությունը։
«Բարգավաճ Հայաստան» կուսակցության առաջնորդ Գագիկ Ծառուկյանը Փրկչի արձանը տեղադրելու մտադրության մասին հայտարարեց այս տարվա հունվարին։ Հուլիսիս 9-ին տրվել էր արձանի շինարարության մեկնարկը:
