Ռազմագերիների, անհետ կորածների խնդրի վերաբերյալ խորհրդարանական փակ քննարկումը չկայացավ, պատճառը հիմնական զեկուցող, ընդդիմադիր «Հայաստան» խմբակցության պատգամավոր Աննա Գրիգորյանի բացակայությունն էր։ Նիստի ընթացքում այս մասին տեղեկացրեց ԱԺ փոխնախագահ Հակոբ Արշակյանը:
«Երրորդ նիստում պետք է քննարկեինք հասարակական հետաքրքրություն ներկայացնող ռազմագերիների, պատանդների, անհայտ կորածների և պահվող այլ անձանց ճակատագրի պարզման և հայրենիք վերադարձնելու խնդիրները, հրատապ թեմայով հարցը, բայց քանի որ հիմնական զեկուցողը դահլիճից բացակայում է, այս հարցը հերթական նիստերի օրակարգից դուրս է գալիս, և մենք շարունակում ենք քննարկել օրակարգային մյուս հարցերը», - հայտնեց ԱԺ փոխնախագահը:
Այս քննարկումը պաշտոնական գրությամբ նախաձեռնել էին ընդդիմադիր խմբակցությունները։ Որոշումն ընդունվեց այսօր առավոտյան 61 կողմ ձայնով: Մինչ քվեարկությունը, սակայն, ընդդիմադիր երկու խմբակցությունները բոյկոտեցին նիստը` լքելով դահլիճը:
«Ընդդիմադիր խմբակցությունները պահանջել էին արտահերթ նիստ, արտահերթ խորհրդի նիստ, որպեսզի երեկ կառավարությունից բացատրություններ ստանանք, թե ինչ է կատարվում մեր հայրենիքի սահմաններում:
Այդ գործընթացը տապալվեց իշխող մեծամասնության կողմից, փոխարենն այսօր ԱԺ օրակարգում մենք տեսնում ենք սնդիկի մասին օրենքի «կարևորագույն» կետի ներառումը: «Պատիվ ունեմ» խմբակցության պատգամավորները կվերադառնան լիագումար նիստերի դահլիճ այն ժամանակ, երբ մեր երկրի առջև ծառացած խնդիրները քննարկվեն ըստ կարևորության և ըստ օրհասական վտանգի, իսկ ձեր սնդիկ փարթիներին մենք մասնակցելու ցանկություն չունենք», - հայտարարեց «Պատիվ ունեմ» խմբակցության պատգամավոր Հայկ Մամիջանյանը:
Նիստից հետո հրավիրված ասուլիսին ընդդիմադիր պատգամավոր Աննա Գրիգորյանը պարզաբանեց` նիստերին դահլիճ չեն վերադառնա անգամ իրենց նախաձեռնած գերիների հարցով քննարկման ընթացքում, քանի որ փակ ձևաչափն իրենց համար անընդունելի է:
«Պահանջել ենք, որպեսզի ներկայանան այս հարցի քննարկման համար Նիկոլ Փաշինյանը, արտաքին գործերի նախարարը, պաշտպանական գերատեսչության ղեկավարը, ինչպես նաև Ազգային անվտանգության ծառայության ղեկավարը: Լավ, եթե ոչ այս հարցով, ուրիշ ի՞նչ հարցով են, որ այս մարդիկ պարտավորվածություն ունեն ներկայանալու: Ազգային ժողովի ղեկավարությունն էլ փաստորեն չի կարողանում ապահովել այս մարդկանց ներկայությունն Ազգային ժողովում», - շեշտեց պատգամավորը:
Կանոնակարգ օրենքի համաձայն՝ հիմնական զեկուցողի բացակայության ժամանակ հարցն օրակարգից դուրս է գալիս։ Ընդդիմադիր «Պատիվ ունեմ»-ը ևս նիստերի դահլիճ չվերադարձավ։ Պատգամավոր Աննա Մկրտչյանը պնդեց՝ իշխող մեծամասնությունը խեղաթյուրել է նիստի բովանդակությունը և ձևաչափը։
«Հարցադրումների նպատակը կայանում է նրանում, որ այն բացը ինֆորմատիվ, որը ստեղծեն են հենց իրենք` իշխանությունները, փորձեն լրացնեն հենց նաև իրենք, բայց իրենք դրա ցանկությունը չունեն, որովհետև ինչպես նախորդ հրատապ հարցով քննարկան նախաձեռնումը, իրենք էլի դա արեցին փակ ֆորմատով, ներկայացրին ոչ պատշաճ պաշտոնյաների ցանկ», - նկատեց նա:
2020-ի նոյեմբերի 9-ի եռակողմ հայտարարության 8-րդ կետը սահմանում է բոլոր ռազմագերիների, պատանդների և պահվող այլ անձանց ու մահացածների մարմինների փոխանակում։ Հայտարարությունից մեկ տարի անց էլ մի քանի տասնյակ հայեր ադրբեջանական գերության մեջ են։
Թե կոնկրետ քանի գերի է մնում Ադրբեջանի բանտերում, պաշտոնական Երևանը չի հստակեցնում, Բաքուն 40 հոգու մասին է հայտարարում։ Եվրադատարանում հայ գերիների շահերի պաշտպան Սիրանույշ Սահակյանի պնդմամբ՝ կան հստակ ապացույցներ, որ Բաքվում պահվող հայերի թիվն առնվազն 3 անգամ շատ է և հասնում է 120-ի։
Բաքուն շարունակում է պնդել, թե վերադարձրել է բոլոր գերիներին՝ ադրբեջանական բանտերում պահվող քաղաքացիներին անվանելով «ահաբեկիչներ»։
