Ազգային անվտանգության ծառայությունը (ԱԱԾ) մանրամասներ է ներկայացնում ընթացող ռազմական գործողություններում ահաբեկչական կազմակերպությունների մասնակցության վերաբերյալ:
Համաձայն հաղորդագրության, անժխտելի տվյալներ են ստացվել, որ
«ան-Նուսրա», «Սուլթան Մուրադ», «Հայաթ Թահրիր աշ–Շամ», «Հուրաս ադ–Դին» ահաբեկչական կազմակերպություններին հարող զինյալները Սիրիայից, Թուրքիայի զինված ուժերի ուղեկցությամբ, ցամաքային
սահմանով անցել են Թուրքիայի տարածք, այնուհետև հատուկ պատրաստություն անցնելով, ինքնաթիռներով տեղափոխվել են Ադրբեջան՝ Արցախի դեմ սանձազերծած ռազմական գործողություններին մասնակցելու նպատակով:
ԱԱԾ-ն հայտնում է, որ Ադրբեջանի զինված ուժերի կազմում ռազմական գործողություններին որպես վարձկաններ մասնակցել են Աբու Սթեֆ ալ–Հինդավին, ով հանդիսանում է Թուրքիայի վերահսկողության
տակ գտնվող այսպես կոչված Սիրիական ազատագրական բանակի անդամ, Ահմադ ալ-Տայեբը, վերջինս սիրիական Իդլիբ քաղաքից է, սովորել է Հալեպի համալսարանում, բնակվում է թուրք-սիրիական սահմանի մոտ գտնվող թուրքական Ռեյհանլի քաղաքում և Աբու Դիաբ Հալաբը:
Ազգային անվտանգության ծառայությունը վերջիններիս մասին
տվյալները փոխանցվել են վարույթն իրականացնող քննչական մարմնին, որի հիման վրա Աբու Սթեֆ ալ–Հինդավին, Ահմադ ալ-Տայեբը, Աբու Դիաբ Հալաբը ներգրավվել են որպես մեղադրյալ, միջնորդություն է ներկայացվել դատարան՝ նրանց նկատմամբ խափանման միջոց կալանավորում կիրառելու նպատակով,
ինչպես նաև հայտարարվել է հետախուզում:
Պարզաբանվել են նաև ռազմական գործողություններին մասնակցող ավելի քան 20 վարձկանների տվյալներ ևս, որոնց թվում են Աբու Արաբա Հասանը, Աբու Շահիր Բզաանը, Մահմուդ Աբու Մուհամմադին, Համմուդ Թելքինը, Աբու Բաշիր Մաարան և այլ անձինք:
Ազգային անվտանգության ծառայությունը հիշյալ անձանց վերաբերյալ պարզված տվյալները հայտնել է միջազգային տարբեր կազմակերպություններին, գործընկեր երկրների հատուկ ծառայություններին՝ հավելյալ տեղեկատվություն ստանալու,
ինչպես նաև ցանկացած երկրի տարածքում նրանց հետագայում հայտնաբերելու դեպքում կալանավորելու և քրեական պատասխանատվության ենթարկելու համար:
ԱԱԾ-ն հայտնում է, որ պարզվել են նաև
ահաբեկչական խմբավորումների ֆինանսավորման աղբյուրները, հավաքագրման եղանակներն ու Սիրիայից և այլ երկրներից Թուրքիայի կողմից Ադրբեջան տեղափոխելու հստակ ուղիները:
Բացի այդ, Արցախում վերջին օրերին կալանավորված երկու ահաբեկիչների՝ նախաքննական մարմնի հետ համագործակցության արդյունքում լրացուցիչ տվյալներ են ստացվել վերջիններիս Ադրբեջանում գտնվելու և ստացած հրահանգավորումների մասով:
«Մասնավորապես, մարտի դաշտ նետելուց առաջ զինյալներին հրահանգավորել են հայկական գյուղերում կենդանի մարդ չթողնել՝
ամեն կտրած հայի գլխի համար խոստանալով 100 ԱՄՆ դոլար պարգևավճար, Ադրբեջանում սպանված ոչ բոլոր ահաբեկիչների ընտանիքներն են ստացել խոստացված փոխհատուցումները, Սիրիայում նրանց ընտանիքների անդամներին չեն
տեղեկացրել բազմաթիվ գրոհայինների մահվան մասին, ինչը դժգոհություններ է առաջացրել Ադրբեջան բերված ահաբեկչական խմբավորումների անդամների մոտ», - ասված է հաղորդագրությունում:
Համաձայն հաղորդագրության, ստացվել են նաև օպերատիվ տեղեկություններ, որ Արցախում ակտիվ ռազմական
գործողությունների ավարտից հետո նշված ահաբեկչական խմբավորումները չեն վերադառնալու Սիրիա, այլ ծրագրում են ուղիներ գտնել՝ տարածաշրջանի տարբեր երկրներ անօրինական ներթափանցելու և ահաբեկչական գործողություններ
իրականացնելու համար:
