Անկարան հաղորդել է, որ ռուսների կողմից աջակցություն ստացող Սիրիայի կառավարական բանակի հասցրած օդային հարվածի արդյունքում Իդլիբում սպանվել է առնվազն 33 թուրք զինծառայող:
Թուրքիայի և Ռուսաստանի հարաբերությունները Սիրիայի հարցում այդ միջադեպից հետո է՛լ ավելի են սրվել:
Սիրիայի հետ սահմանի մոտ գտնվող Հաթայի շրջանի նահանգապետ Ռահմի Դողանն ասել է, որ շրջանի հիվանդանոցներում այժմ բուժում են ստանում 32 վիրավոր թուրք զինվորներ:
«Ի պատասխան Սիրիայի բանակի հասցրած օդային հարվածի, Թուրքիան և՛ օդային, և՛ ցամաքային հարվածներ կհասցնի սիրիացիներին», - ասել է նախագահ Ռեջեփ Էրդողանի խոսնակ Ֆահրեթին Ալթունը:
Թուրքերի պնդմամբ՝ պատասխան գործողությունների արդյունքում սպանվել է 16 սիրիացի զինվոր:
Պաշտոնական Դամասկոսը դեռևս չի մեկնաբանել միջադեպը: Ռուսները հայտնել են, թե թուրք զինծառայողները «հայտնվել էին ահաբեկիչների շարքերում»:
Թուրքիայի պաշտպանության նախարար Հուլուսի Աքարը բանակի գործողությունները ղեկավարում է անմիջապես Սիրիայի հետ սահմանի մոտ տեղակայված շտաբից:
