Ազգային ժողովի նախկին պատգամավոր Մանվել Գրիգորյանին դատաբժշկական փորձաքննության ենթարկելու նպատակով ստեղծված միջգերատեսչական հանձնաժողովը եզրակացրել է, որ գեներալի առողջական վիճակը չի խոչընդոտում, որպեսզի ներկա լինի դատական նիստերին։ Հանձնաժողովը եզրակացրել է նաև, որ Գրիգորյանի հիվանդությունները համատեղելի են կալանքի հետ։
Հանձնաժողովի եզրակացությունը այսօր Մանվել Գրիգորյանի և նրա կնոջ՝ Նազիկ Ամիրյանի գործով դատական նիստի ժամանակ ընթերցեց դատավորը․ - «Ներկայումս վերը նշված ախտորոշման մեջ արտացոլված հիվանդությունները և նրանց բարդությունների արտահայտման աստիճանները չեն համապատասխանում Հայաստանի Հանրապետության կառավարության 2006 թվականի մայիսի 26-ի թիվ 829 որոշման երկրորդ հավելվածով նախատեսված՝ պատիժը կրելուն խոչընդոտող ծանր հիվանդությունների (ըստ Հիվանդությունների և առողջության հետ կապված 10-րդ վերանայված վիճակագրական դասակարգչի) հիվանդության ծանրության աստիճանը բնորոշող ախտանիշներով և ֆունկցիոնալ խանգարումներով այդ ցանկում ներառված որևէ կետի: Ներկա առողջական վիճակով Մանվել Գրիգորյանը կարող է բուժումները ստանալ Հայաստանի Հանրապետության որևէ հիվանդանոցում՝ հագեցած մասնագիտական ծառայություններով, իսկ քրեակատարողական հիմնարկում կարող է նման բուժումներ ստանալ, եթե քրեակատարողական հիմնարկն ապահովված լինի բոլոր նշյալ պայմաններով»:
Միևնույն ժամանակ, փորձագետները նշել են, որ Գրիգորյանի հիվանդություններում բացասական դինամիկա է նկատվում, կյանքին սպառնացող ռիսկեր կան, սակայն համապատասխան բուժման և սննդակարգի պահպանման պայմաններում հնարավոր է, որ այդ ռիսկերը լինեն նվազագույն:
Մանվել Գրիգորյանի նկատմամբ միջգերատեսչական հանձնաժողովային դատաբժշկական փորձաքննություն նշանակվել էր դեռ երեք ամիս առաջ։ Հանձնաժողովի կազմում 7 փորձագետներ էին, որոնցից մեկը միայն՝ պաշտպանական կողմի միջնորդությամբ ներգրավված ուռուցքաբան Նորբերտ Ավետյանը, ով ութ տարի բուժել է Մանվել Գրիգորյանին, համաձայն չի եղել ներկայացված եզրակացությանը։ Իր եզրակացությունում Ավետյանը գրել է, որ Գրիգորյանի կյանքին վտանգ է սպառնում:
Պաշտպան Լևոն Բաղդասարյանն այսօր միջնորդեց, որ փորձագետները հրավիրվեն դատարան՝ հարցաքննության, քանի որ պաշտպանական կողմի համար եզրակացությունը բավարար չափով պարզ չէ և ունի բացեր։ Նա հերթական անգամ ներկայացրեց նաև Գրիգորյանի կալանավորումը գրավով փոխարինելու միջնորդություն։
Միջնորդությունների քննարկումը հետաձգվեց։
Այս պահին Մանվել Գրիգորյանը գտնվում է քաղաքացիական հիվանդանոցում։ Գեներալը առողջական վիճակի պատճառաբանությամբ չի ներկայանում արդեն տասից ավելի դատական նիստերի: Դատարանը գրությամբ կդիմի «Նաիրի» բժշկական կենտրոն, որպեսզի հաջորդ դատական նիստին ապահովվի ամբաստանյալի ներկայությունը։
63-ամյա Մանվել Գրիգորյանը կալանքի տակ է այս տարվա հունվարից, նա մեղադրվում է ապօրինի կերպով զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ:
Նազիկ Ամիրյանը մեղադրվում է ամուսնու, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ ապօրինի կերպով իրենց պատկանող երեք տներում ռազմամթերթ, պայթուցիկ նյութեր պահելու, ինչպես նաև տարբեր տեսակի հափշտակություններ կատարելու մեջ։ 52-ամյա Ամիրյանի խափանման միջոց է ընտրված ստորագրությունը չհեռանալու մասին:
