Հայաստանի երկրորդ նախագահ Ռոբերտ Քոչարյանը նախազգուշացնում է, թե «որքան ավելի եռանդուն իշխանությունը փորձի «մաքրել» քաղաքական դաշտը, այնքան ավելի իրական կլինի քաղաքական ցնցումների հեռանկարը»:
Իր ոչ պաշտոնական կայքէջի՝ 2rd.am-ի հետ զրույցում անդրադառնալով նախագահ Սերժ Սարգսյանի փետրվարի 12-ի աղմկահարույց ելույթից հետո երկրում ստեղծված ներքաղաքական իրավիճակին՝ Քոչարյանը, մասնավորապես ասում է․ - «Չեմ կարող բացատրել, թե ինչի համար էր դա պետք նախագահին: Եթե հաշվարկն այն էր, թե Գագիկ Ծառուկյանի վրա ճնշում գործադրելով ԲՀԿ-ն կկազմալուծվի, ապա համապատասխան էֆեկտը չստացվեց: Ընդհակառակը. ընդդիմադիր դաշտում ակնառու են համախմբման հստակ նշաններ՝ բառապաշարի և նպատակների կտրուկ ռադիկալացմամբ: ԲՀԿ-ի վարկաբեկում նույնպես տեղի չունեցավ՝ չափազանց անհամոզիչ փաստարկների պատճառով»:
Երկրորդ նախագահը շարունակում է․ - «Ցանկացած գործողություն ԲՀԿ ղեկավարի դեմ բոլորի կողմից հիմա կգնահատվի որպես քաղաքական հետապնդում, որը զուրկ է որևէ լեգիտիմությունից: Իսկ հաշվի առնելով երկրում սոցիալական լարվածության և դժգոհության աստիճանը, ինչպես նաև ԲՀԿ-ի և նրա ղեկավարի լայն ժողովրդականությունը՝ որքան ավելի եռանդուն իշխանությունը փորձի «մաքրել» քաղաքական դաշտը, այնքան ավելի ուժեղ է լինելու համախմբումն իշխանության դեմ և այնքան ավելի իրական կլինի քաղաքական ցնցումների հեռանկարը»:
Անցած հինգշաբթի ելութ ունենալով ՀՀԿ խորհրդի նիստում նախագահ Սարգսյանը, ԲՀԿ ղեկավար Գագիկ Ծառուկյանին կոչելով «չարիք» և «կեղծ քաղաքական երևույթ», մասնավորապես հայտարարել էր․ - «Այս պահին, շատ ավելի կարևոր է հենց հիմա զբաղվել քաղաքական դաշտի մաքրմամբ, քաղաքական դաշտում քաղաքական գործիչների համար տեղ բացելով, որ հնարավոր լինի քաղաքակա՛ն լուծումներ գտնել, քաղաքակա՛ն որոշումներ կայացնել: Մենք պիտի քաղաքական դաշտը իսպառ մաքրենք ֆեոդալական տրամաբանությունից»:
Դիտարկմանը, թե թվում է, որ այս ամենն իսկապես կարող է պայթեցնել ներքաղաքական իրավիճակը, և հարցին, թե արդյո՞ք իշխանությունները ելք ունեն դրանից, Ռոբերտ Քոչարյանը արձագանքում է․ - «Կարծում եմ՝ դեռևս ունեն: Կանգ առնել և չդիմել ոչ մի ակտիվ վարչական գործողության ԲՀԿ ղեկավարի նկատմամբ, մնալ բացառապես բանավոր մենամարտի սահմաններում, վերադառնալ ընդդիմախոսների հետ հակադրման քաղաքական հարթություն: Իշխող կուսակցության կողմից ՀՀԿ խորհրդի նիստին բարձրաձայնված մտադրությունները չեն տեղավորվում ՀՀ Սահմանադրության շրջանակներում և ԲՀԿ-ին ու ընդհանրապես՝ ընդդիմությանը բառացիորեն մղում են կազմակերպել մասսայական փողոցային գործողություններ, որոնց հետևանքներն անկանխատեսելի են: Ձերբակալություններն ու ռեպրեսիվ գործողությունները կտանեն երկիրը դեպի խորը ու երկարատև ճգնաժամ»:
ՀՀԿ խորհրդարանական խմբակցության ղեկավար Վահրամ Բաղդասարյանը «Աազատության» խնդրանքով մեկնաբանելով Ռոբերտ Քոչարյանի հարցազրույցը՝ վերջինիս հետևյալ խորհուրդը տվեց․ - «Խաղաղասիրական և հակասահմանադրական կոչերի փոխարեն պետք է ժամանակին ձեռնպահ մնային այդ մարդուն այս վիճակին հասցնելու համար, որ արդեն ինքը օրինախախտությունների ճանապարհով, անհնազանդության կոչեր անելով ցանկանում է հանրահավաքներ կազմակերպել: Ինձ թվում է դրա դրդապատճառները պարզ են, և իրենք պետք է ժամանակին կանխեին և ոչ թե հիմա խաղաղասիրական կոչերով հանդես գային»:
«Եթե ընդդիմության մտադրությունը նոր Մարտի 1 սարքելն է, ապա պարզ է՝ ինչ հակադարձ քայլեր կլինեն», - շարունակեց Բաղդասարյանը: - «Ինձ թվում է, որ իշխանությունը զգոն է և թույլ չի տա, որ պետական հեղաշրջման կոչեր անողները, անհիմն հեղափոխություններ կատարողները, սադրիչ գործողություններ անողները հանրահավաքներ կազմակերպեն նման ոճով: Եվ օրենքի սահմաններում դրանք ամեն ինչը կանխարգելելու ենք, որպեսզի մեր երկիրը ցնցումների չտանեն»:
Զրույցի ավարտին Բաղդասարյանն ասաց, որ քաղաքական ցնցումների հեռանկար չի տեսնում․ - «Ոչ: Դրանք ամեն ինչը հաշվարկված են, և մենք տիրապետում ենք իրավիճակին»:
