Կարմիր Խաչի միջազգային կազմակերպության (ԿԽՄԿ) ներկայացուցիչներն այցելել են մոտ մեկ ամիս առաջ Քարվաճառ ներթափանցած և Լեռնային Ղարաբաղի իրավապահների կողմից ձերբակալված ադրբեջանցի դիվերսանտներ Դիլհամ Ասկերովին և Շահբազ Գուլիևին: Այդ մասին APA լրատվական գործակալությանը հայտնել են Ադրբեջանում ԿԽՄԿ-ի ներկայացուցչությունից՝ մանրամասներ չփոխանցելով:
Երկու ադրբեջանցիները, հիշեցնենք, մեղադրվում են Նոր Էրքեջ գյուղի 17-ամյա բնակիչ Սմբատ Ցականյանին ու «Նիվա»-ի վարորդ, 42-ամյա մայոր Սարգիս Աբրահամյանին սպանելու, 37-ամյա Կարինե Դավթյանին ծանր վիրավորելու համար՝ ազգային ատելության շարժառիթներով մարդուն առևանգելով սպանելու, կազմակերպված խմբի կողմից անչափահասի նկատմամբ զենքի գործադրմամբ բռնություն գործադրելու, լրտեսության, Ղարաբաղի պետական սահմանը կազմակերպված խմբի կողմից հատելու, հրազեն և ռազմամթերք կրելու հատկանիշներով։
Երրորդ դիվերսանտը, ադրբեջանական լրատվամիջոցների վկայությամբ՝ Հասան Հասանով անուն-ազգանունով, ձերբակալման պահին դիմադրություն է ցույց տվել և ոչնչացվել է, նրան հուղարկավորել են Լեռնային Ղարաբաղում:
Պնդելով, որ ձերբակալված դիվերսանտների վրա չի տարածվում «Ռազմագերիների հետ վարվելակերպի մասին» Ժնևի կոնվենցիան, հայկական կողմը, այդուհանդերձ, վստահեցնում է, որ նրանց նկատմամբ մարդասիրական վարվելակերպ է ցուցաբերվում, և որպես բարի կամքի դրսևորում թույլ է տալիս Կարմիր Խաչի ներկայացուցիչների տեսակցությունները նրանց հետ:
