Спадарожнікавыя здымкі і іншыя наяўныя зьвесткі пацьвярджаюць, што Расея страціла ня менш за 10 стратэгічных бамбавікоў у выніку нападу ўкраінскіх дронаў на расейскія аэрадромы, піша Расейская служба Радыё Свабода.
OSINT-аналітык Крыс Бігерс у панядзелак раніцай апублікаваў спадарожнікавыя здымкі аэрадрому «Белая» ў Іркуцкай вобласьці пасьля ўдару ўкраінскіх дронаў. Яны зробленыя з дапамогай радара з сынтэзаванай апэртурай (SAR), які дазваляе «бачыць» аб’екты на зямлі скрозь аблокі.
З фатаграфіяў вынікае, што на авіябазе былі зьнішчаныя 4 стратэгічныя бамбавікі Ту-95 і столькі ж Ту-22.
Такіх жа здымкаў другой атакаванай авіябазы, «Аленевая» ў Мурманскай вобласьці, пакуль няма, але ў спалучэньні з апублікаванымі Службай бясьпекі Ўкраіны відэа з дронаў можна падсумаваць беспрэцэдэнтны ўкраінскі ўдар па расейскіх вайсковых аэрадромах.
Паводле падлікаў карыстальніка сацыяльнай сеткі X Intelshizo, на аэрадромах «Белая» і «Аленевая» былі зьнішчаныя прынамсі:
- 7 стратэгічных бамбавікоў Ту-95 (яшчэ адзін пашкоджаны),
- 4 стратэгічныя бамбавікі Ту-22,
- 1 вайскова-транспартны самалёт Ан-22.
Служба бясьпекі Ўкраіны раней заявіла, што ў выніку нападу на аэрадромы ў некалькіх вобласьцях Расеі былі паражаныя «34% стратэгічных носьбітаў крылатых ракет на асноўных аэрадромах базаваньня Расеі» — гэта значыць 43 самалёты. Незалежнага пацьверджання гэтай лічбы няма.
Дакладна вядома аб пашкоджаньні або зьнішчэньні самалётаў толькі на дзьвюх базах — у Мурманскай і Іркуцкай вобласьцях. У Іванаўскай, Разанскай і Амурскай вобласьцях, таксама названых у паведамленьнях СБУ, напады, як сьцьвярджае Міністэрства абароны Расеі, былі адбітыя.
У Мурманскай і Іркуцкай вобласьцях дроны, якія атакавалі авіябазы, вылецелі з грузавых фураў. Апублікаваныя шматлікія відэа, зьнятыя відавочцамі.
Кантэйнэры з дронамі, якія ў нядзелю 1 чэрвеня атакавалі Мурманскую і Іркуцкую вобласьці, маглі быць сабраныя на складзе ў Чалябінску. Пра гэта паведамляюць тэлеграм-каналы Baza і Mash з спасылкай на OSINT-адмыслоўцаў. Яны вывучылі фатаграфіі, апублікаваныя ўкраінскімі крыніцамі, і выявілі падобны склад на Сьвярдлоўскім тракце ў Чалябінску.
Прэзыдэнт Украіны Ўладзімір Зяленскі пацьвердзіў, што атака дронаў на стратэгічныя аэрадромы Расеі была спэцапэрацыяй СБУ.
«Цалкам бліскучы вынік. Самастойны вынік Украіны. Год, шэсьць месяцаў і дзевяць дзён з пачатку плянаваньня да эфэктыўнай рэалізацыі. Найбольш дальнабойная наша апэрацыя», — напісаў прэзыдэнт Украіны ў Тэлеграме пасьля сустрэчы з кіраўніком СБУ Васілём Малюком.
Расейскае Міністэрства абароны назвала здарэньне «тэрактам». Многія праваенныя блогеры пішуць, што падобная атака тэарэтычна адпавядае крытэру расейскай ядзернай дактрыны, паводле якога Расея можа ўжыць ядзерную зброю ў адказ на аб’екты стратэгічных ядзерных сілаў. Аднак ніякай рэакцыі расейскага кіраўніцтва на напады пакуль не было.
