Закалоты ў Кіеве. Сутычкі паміж міліцыяй і ўдзельнікамі Эўрамайдану (УЖЫВУЮ)
абноўлена
На вуліцы Грушэўскага, якая перакрытая кардонам унутраных войскаў, адбыліся сутычкі паміж міліцыяй і мітынгоўцамі. Ужыты сьлезацечны газ, сьвятла-шумавыя гранаты і іншыя спэцсродкі. Арганізатары Эўрамайдану чакаюць штурму. Міліцыя падагнала ў цэнтар Кіева вадамёты і спэцтэхніку.
Байцы спэцаддзелу міліцыі «Беркут» фармуюць калёны і рыхтуюцца да разгону мітынгоўцаў на вуліцы Грушэўскага ў цэнтры Кіева, толькі супраць людзей скіравалі вадамёты.
Народныя дэпутаты з апазыцыі з гукаўзмацняльнікаў зьвяртаюцца да камандзіраў праваахоўнікаў і просяць іх «не ўжываць сілу супраць народа», перадае карэспандэнт Радыё Свабода.
Депутат Вярхоўнай Рады Алег Ляшко папрасіў жанчын адысьці ад месца здарэньня, паколькі радыкальна настроеныя маладыя не зьвяртаюць увагі на заклікі дэпутатаў спыніць правакаваць праваахоўнікаў. Маладыя закідваюць вартавых парадку пэтардамі, тыя ў адказ ўжываюць сьлезацечны газ і сьвятла-шумавыя гранаты. Чытаць далей...
20:3019.1.2014
ВІДЭА: У Кіеве пад стадыёнам «Дынама» ім. В. Лабаноўскага адбыліся сутычкі паміж мітынгоўцамі і сілавікамі. Людзі адцягнулі ўручную адзін з аўтобусаў, раздаваліся выбухі
Каля стадыёна працягваюцца сутычкі. Дэманстранты спрабавалі збудаваць барыкаду, але пакуль беспасьпяхова. У байцоў міліцыі і ўнутраных войскаў ляцяць пэтарды і камяні. Спэцслужбы кідаюць у натоўп сьвятла-шумавыя гранаты
21:0319.1.2014
Паводле відавочцаў, міліцыя ўжыла гумовыя кулі супраць дэманстрантаў
«Зараз я паеду да Януковічу і зьвярнуся да яго асабіста з патрабаваннем спыніць супрацьстаянне міліцыі і людзей», — сказаў Клічко некалькі гадзінаў таму. Паводле паведамленьняў журналістаў, яго прапусьцілі праз кардон аховы.
Некалькі гадзінаў таму Віталь Клічко заклікаў са сцэны Эўрамайдану прэзыдэнта Віктара Януковіча «прыбраць з вуліцаў Кіева міліцыю, Беркут і цітушак» і не паўтараць шлях дыктатараў Чаўшэску і Кадафі
Паводле Клічко, адзіным выйсьцем з сытуацыі зьяўляюцца датэрміновыя парлямэнцкія і прэзыдэнцкія выбары.
«Знайдзіце ў сабе мужнасьць, не паўтарайце шлях Чаўшэску і Кадафі! У гэтай барацьбе так ці інакш пераможа ўкраінскі народ», — заявіў Клічко.
Разам з тым ён яшчэ раз зьвярнуўся да міліцыі з заклікам пераходзіць на бок народа.
«Вы павінны абараняць свой народ, а не нападаць на яго», — заявіў Клічко.
21:2019.1.2014
В Киеве на #ЄвроМайдан явно разыгрывается минский сценарий - ждем тотальные посадки по статье "массовые беспорядки".
Шматгадзіннае супрацьстаяньне паміж радыкальна настроенымі дэманстрантамі і праваахоўнікамі ўзмацняецца. Па кадрах відэатрансьляцыі Радыё Свабода відаць, што шэрагі байцоў спэцаддзелу міліцыі «Беркут» падышлі амаль ушчыльную да аўтобусаў, якія падзяляюць бакі супрацьстаяньня.
Між тым, мітынгоўцы спрабуюць зрушыць зь месца адзін з гэтых аўтобусаў. Ушчыльную да лініі аўтобусаў пад’ехаў аўтамабіль, які нагадвае вадамёт.
Прыкладна зь 15:00 па кіеўскім часе пасьля завяршэньня выступаў лідэраў Эўрамайдану радыкальна настроеная частка мітынгоўцаў рушыла ў Вярхоўную Раду. На вуліцы Грушэўскага каля стадыёна «Дынама» іх сустрэлі шэрагі ўнутраных войскаў і спецаддзелу «Беркут».
22:1119.1.2014
У Кіеве пачаліся затрыманьні
Міліцыя затрымала чатырох актыўных удзельнікаў падзеяў на Эўрапейскай плошчы ў Кіеве.
Як паведамілі ва Ўпраўленні сувязяў з грамадзкасьцю МУС Украіны, правапарушальнікаў даставілі ў адзін з аддзелаў міліцыі, зараз праваахоўнікі высьвятляюць асобы затрыманых і сьледчыя вызначаюцца з кваліфікацыяй дзеяньняў дастаўленых грамадзянаў, адзначаюць у МУС.
Сутыкненьні паміж прысутнымі і праваахоўнікамі ў цэнтры Кіева на вуліцы Грушэўскага не сьціхаюць ужо 6 гадзінаў. Яны пачаліся пасьля таго, як радыкальна настроеныя мітынгоўцы вырашылі прарвацца праз кардон міліцыі ў Вярхоўную Раду.
У Кіеве больш чым месяц абмежаваны доступ грамадзянаў ва ўрадавы квартал. У прыватнасьці, перакрытая грузавікамі і аўтобусамі вуліца Грушэўскага і вуліца Інстытуцкая.
22:4919.1.2014
Граната на вуліцы Грушэўскага параніла двух журналістаў
Сьвятла-шумавая граната, якая разарвалася паблізу журналістаў каля стадыёну «Дынама» ў Кіеве, параніла прынамсі двух супрацоўнікаў мэдыяў.
Адна журналістка атрымала траўму твару з прычыны трапленьня аскепку, у другога журналіста, зь якім працуюць мэдыкі, верагодна, кантузія, інфармуе «Інтэрфакс-Украіна».
Сутыкненьні паміж мітынгоўцамі і праваахоўнікамі ў цэнтры Кіева на вуліцы Грушэўскага не сьціхаюць ужо больш за шэсьць гадзінаў. Яны пачаліся пасьля таго, як радыкальна настроеныя мітынгоўцы вырашылі прарвацца праз кардон міліцыі ў Вярхоўную Раду.
У Кіеве на працягу больш чым месяца абмежаваны доступ грамадзянаў ва ўрадавы квартал. У прыватнасьці, перакрытая грузавікамі і аўтобусамі вуліца Грушэўскага і вуліца Інстытуцкая.
23:0719.1.2014
Януковіч прапануе круглы стол
Прэзыдэнт Украіны Віктар Януковіч прапануе правесьці ў панядзелак, 20 студзеня, новы агульнанацыянальны круглы стол.
Аб атрыманым званку гэтага зьместу са сцэны Эўрамайдану паведаміў лідэр парлямэнцкай фракцыі «Бацькаўшчына» Арсень Яцанюк.
Яцанюк папрасіў аб згодзе Майдану на такі крок.
Раней іншы апазыцыйны лідэр Віталь Клічко з групай народных дэпутатаў паехаў у Межыгор’е, каб сустрэцца зь Віктарам Януковічам.
Перад гэтым Клічко запісаў свой відэазварот. У ім ён заклікае Януковіча не пасылаць праваахоўнікаў супраць народа і пайсьці на датэрміновыя прэзыдэнцкія выбары.
Клічко: Януковіч паабяцаў, што заўтра будзе створаная камісія па ўрэгуляваньні палітычнага крызісу
Прэзыдэнт паабяцаў у панядзелак раніцай стварыць камісію з прадстаўнікоў Адміністрацыі Прэзыдэнта, Кабінэту міністраў і прадстаўнікоў апазыцыі, якая зоймецца вырашэньнем крызіснай сытуацыі ў краіне. Пра гэта сказаў Віталь Клічко пасьля сустрэчы зь Януковічам у Межыгор’і, піша сайт партыі УДАР.
«Мы з дэпутатамі прыехалі ў Межыгор’е і паўгадзіны чакалі ля кардону ўнутраных войскаў, якія нас не прапускалі. Затым пусьцілі толькі мяне. Я паўтарыў патрабаваньні людзей, якія два месяцы пратэстуюць на Майдане. І што трэба неадкладна вырашыць палітычны крызіс», — падкрэсьліў Клічко.
00:1320.1.2014
Хлопцу міліцэйскай гранатай адарвала руку
Актывісты Аўтамайдану заявілі, што аднаму з пратэстоўцаў на вуліцы Грушэўскага падчас сутычак зь міліцыяй адарвала кісьць рукі. Пра гэта паведамляе «ЛІГАБізнэсІнформ».
Паводле дадзеных актывістаў, на якіх спасылаецца выданне, пацярпелы спрабаваў адкінуць сьвятла-шумавую гранату, кінутую сілавікамі, і яна, мабыць, выбухнула ў яго руцэ.
У адной з сутычак пратэстоўцы захапілі спэцназаўца-«беркутаўца» і пацягнулі яго ў бок Майдану з крыкамі «забойца». Аднак, як адзначыў «Правы сэктар» на сваёй старонцы ў Facebook, «беркутаўца» адпусьцілі.
02:2220.1.2014
Аўтамайдан аб'явіў Клічка лідэрам супраціву
Актывісты Аўтамайдану вызначыліся зь лідэрам супраціву, якога сёньня патрабавалі назваць са сцэны Майдану падчас Народнага веча супраць дыктатуры. Гэтым лідэрам зьяўляецца Віталь Клічко, паведаміў на сваёй старонцы на Фэйсбук і старонцы Аўтамайдану актывіст Зьміцер Булатаў.
«У самы цяжкі і небясьпечны час для народа Ўкраіны толькі адзін лідэр быў зь людзьмі на першай лініі фронту! Гэта Віталь Клічко! Сапраўдныя дзеяньні ў неабходны момант каштуюць значна больш, чым размовы, пляны і стратэгіі. Аўтамайдан вызначыўся з адзіным лідэрам супраціву і гатовы падтрымліваць яго ў барацьбе з беззаконьнем, што пранізала ўсе галіны ўлады, у барацьбе за ўсталяваньне праўнай Дзяржавы зь людзкімі каштоўнасьцямі. Ад сёньняшняга дня для нас Віталь Клічко — лідэр супраціву», — гаворыцца ў паведамленьні.
Раней лідэры Аўтамайдану выступілі супраць нематываванага ўжываньня сілы і кровапраліцьця, камэнтуючы заклікі яшчэ аднаго аўтамайданаўца Сяргея Кобы пікетаваць будынак Вярхоўнай Рады з патрабаваньнем да дэпутатаў адмяніць прынятыя 16 студзеня законы.
