Як распавёў Сяржук Серабро, бел-чырвон-белы сьцяг быў прымацаваны на даху жылога пяціпавярховага дома па вуліцы Герцэна. Пакуль яго заўважылі міліцыянты, сьцяг правісеў над галовамі ў мінакоў каля сарака хвілін.
Супрацоўнікі міліцыі выклікалі пажарную машыну, а ў затрыманага журналіста праверылі дакумэнты, але забаранілі фатаграфаваць і сам сьцяг, і тое, як яго здымаюць. Пасьля таго, як сьцяг зьнялі і паклалі ў міліцэйскую машыну, Сержука Серабро адпусьцілі.
Як стала вядома, да сьцяга была прымацаваная цыдулка: “Да народзінаў мужнага змагара Янкі Філістовіча, для якога лёс Радзімы быў вышэйшы за ўласнае жыцьцё. Слава беларускаму герою! Мірон”.
Спадар Хамайда адзначыў, што ён асабіста даведаўся пра ўдзельніка антысавецкага супраціву з кнігі Аляксандра Лукашука “Філістовіч. Вяртаньне нацыяналіста”.
9 верасня 1951 году Янка Філістовіч быў дэсантаваны на Беларусь, як прадстаўнік Рады Беларускай Народнай Рэспублікі. Ён стварыў на Маладэчаншчыне антысавецкую падпольную групу, якая пасьпела выдаць адзін нумар газэты “Жыве Беларусь” і адну ўлётку. 5 верасьня 1952 году група Філістовіча была зьнішчаная апэратыўна-ваенізаваным падразьдзяленьнем МГБ БССР, а захоплены ў выніку здрады кіраўнік праз колькі дзён быў растраляны.
14 студзеня Янку Філістовічу магло б споўніцца 84 гады. Няўлоўны Мірон адзначыў ягоныя ўгодкі.
