«Каб усякі плян меў вынік, патрэбны ўдзел украінцаў і эўрапейцаў», — сказала Кая Калас журналістам перад сустрэчай міністраў замежных справаў ЭЗ у Брусэлі.
Яна таксама адзначыла, што Эўразьвяз заўсёды выступаў за дасягненьне трывалага, устойлівага і справядлівага міру.
Большасьць міністраў замежных справаў краін ЭЗ заявілі, што ня бачылі, каб мірны плян ЗША і Расеі публікавалі ў мэдыя, і выказалі свае асьцярогі. Яны рабілі камэнтары на прэс-канфэрэнцыі перад пачаткам сустрэчы міністраў замежных справаў ЭЗ у Брусэлі 20 лістапада, паведамляе карэспандэнт Радыё Свабодная Эўропа / Радыё Свабода ў Брусэлі.
Амаль усе міністры замежных справаў ЭЗ, якія выступалі перад прэсай, настойвалі на тым, што ніякіх мірных перамоваў ня можа адбыцца без удзелу Ўкраіны.
Міністар замежных справаў Францыі Жан-Наэль Баро падкрэсьліў, што «мір не азначае капітуляцыі». Паводле яго, было б рацыянальна пачаць з «неадкладнага безумоўнага спыненьня агню».
«Мы хочам міру, украінцы хочуць міру: справядлівага міру, які паважае сувэрэнітэт, і трывалага міру, які ня можа быць пастаўлены пад сумнеў будучай агрэсіяй. Але мір — гэта не капітуляцыя. Мы ня хочам, каб Украіна капітулявала, і відавочна, што ўкраінцы, якія гераічна супраціўляюцца больш за тры гады, ніколі не пагодзяцца на капітуляцыю», — сказаў Баро.
Міністар Чэхіі Ян Ліпаўскі угледзеў у сытуацыі «зноў мюнхэнскі сцэнар» і прынцып «Украіна без Украіны».
Паводле міжнародных мэдыя, новы праект мірнага пагадненьня, прапанаваны Злучанымі Штатамі, прадугледжвае значныя саступкі ад Украіны, у прыватнасьці, у тэрыторыях і ўзбраеньні. Паводле СМІ, прапановы ЗША ўключаюць скарачэньне Ўзброеных сілаў Украіны і зьніжэньне вайсковай дапамогі ЗША, неабходнай для барацьбы Ўкраіны супраць расейскіх войскаў. Акрамя таго, ініцыятыва прапаноўвае не дапускаць замежныя войскі на ўкраінскую тэрыторыю і больш не перадаваць Кіеву зброю далёкага радыюсу дзеяньня.
Аднак не паведамляецца, на якія саступкі павінна пайсьці Масква.
Прапановы, падрабязна апісаныя The Financial Times і Reuters, у значнай ступені адпавядаюць жорсткім патрабаваньням, якія Расея выстаўляла з пачатку гэтага году, калі прэзыдэнт Дональд Трамп пастанавіў пачаць простыя перамовы з Масквой аб вайне ва Ўкраіне.
Тым часам Масква заявіла, што адкрытая для перамоваў па Ўкраіне, дадаўшы, што пры патрэбе можа арганізаваць тэлефонную размову паміж прэзыдэнтам ЗША Дональдам Трампам і прэзыдэнтам Расеі Ўладзімірам Пуціным.
Кіеў афіцыйна не адрэагаваў на гэтыя паведамленьні.
Форум