Знайшліся ахвочыя купіць 14 найтаньнейшых карцін з калекцыі Бабарыкі. Таргі за іх праходзяць 8 кастрычніка, як вынікае са зьвестак сайту «БелЮрЗабесьпячэньне».
Цэны 14 карцін стартуюць ад 165 рублёў і даходзяць да 99,3 тысячы рублёў. Да прыкладу, твор Файбіша-Шрагі Царфіна «Вадаспад у лесе», напісаны каля 1950 году, каштуе 8276 рублёў. Знайшліся трое ахвочых яго набыць. Пачатковая цана карціны «Чырвоны замак» — 9931 рубель. За яе на таргах змагаюцца два ўдзельнікі. Тым часам не знайшлося ахвочых купіць найбольш каштоўныя карціны з калекцыі экс-банкіра.
Агульная стартавая цана ўсіх твораў мастацтва — каля 344 тысяч рублёў, паведамляе «Люстэрка».
Раней праз аўкцыёны прадалі іншую маёмасьць Віктара Бабарыкі, у тым ліку зямельны надзел, аўтамабіль, гадзіньнік.
Прадаюць у Беларусі маёмасьць і іншых палітвязьняў і палітычных эмігрантаў.
Перасьлед Віктара Бабарыкі
Пра ўмовы, у якіх цяпер знаходзіцца Віктар Бабарыка і як ён пачуваецца, зьвестак вельмі мала. Паводле апошніх зьвестак інтэрнэт-выданьня «Позірк», у сярэдзіне жніўня Віктара Бабарыку вярнулі з мэдычнай часткі ў атрад, ён зноў працуе ў пякарні наваполацкай калёніі № 1, куды трапіў у канцы 2021 году.
Вядома таксама, што да мэдычнай часткі Бабарыка знаходзіўся ў ПКТ (памяшканьні камэрнага тыпу).
Апошні раз публічныя зьвесткі пра Віктара Бабарыку апублікаваў у студзені 2025 году былы апазыцыйны актывіст Раман Пратасевіч, які зьмясьціў у сваім тэлеграм-канале фатаграфію і відэазварот Бабарыкі да родных. З таго часу невядома, ці даходзяць лісты Віктара Бабарыкі да блізкіх.
Віктара Бабарыку затрымалі 18 чэрвеня 2020 году разам з сынам Эдуардам, калі яны накіроўваліся ў ЦВК здаць сабраныя подпісы. Паводле зьвестак ягонага штабу, іх было сабрана больш за 430 тысяч, а пададзена ў ЦВК — 365 тысяч. Затрымліваў старэйшага і малодшага Бабарыкаў Дэпартамэнт фінансавых расьсьледаваньняў Камітэту дзяржаўнага кантролю. Цэлы дзень да затрыманых не пускалі адвакатаў. У той жа дзень Віктара Бабарыку зьмясьцілі ў СІЗА КДБ.
6 ліпеня 2021 году суд Маскоўскага раёну Менску прызнаў Віктара Бабарыку вінаватым у «атрыманьні хабару ў асабліва буйным памеры» (ч. 3 арт. 430 КК) і ў «легалізацыі сродкаў, атрыманых злачынным шляхам» (ч. 2 арт. 235 КК) ды асудзіў былога кандыдата ў прэзыдэнты, які так і не прызнаў віны, на 14 гадоў зьняволеньня. Таксама былога банкіра пакаралі штрафам у 145 тысяч рублёў (пяць тысяч базавых велічыняў), ён мусіць выплаціць больш за 46 мільёнаў рублёў, каб пагасіць нібыта нанесеную ім шкоду.
У наваполацкай калёніі № 1 Віктара Бабарыку некалькі разоў зьмяшчалі ў ШЫЗА і ПКТ. У 2023 годзе стала вядома, што палітвязень трапляў у шпіталь у стане сярэдняй цяжкасьці. Як казалі іншыя вязьні, у Бабарыкі знайшлі вадкасьць у лёгкіх.
З пачатку лютага 2023 году Віктара Бабарыку трымалі ў рэжыме інкамунікада, які працягваўся больш за паўтара году і ў пачатку 2025 году фактычна аднавіўся. Сын Бабарыкі Эдуард — таксама палітвязень, ён асуджаны на 10 гадоў зьняволеньня, адбывае пакараньне ў жодзінскай турме № 8 на турэмным рэжыме.
Віктар Бабарыка ўдавец, ягоная дачка Марыя жыве за мяжой.
Перасьлед Віктара Бабарыкі. Што важна ведаць
- Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
- У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
- 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
- Віктар Бабарыка віны не прызнае.
Хроніка перасьледу
- 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
- 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
- Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
- 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
- 12 чэрвеня Лукашэнка заявіў, што Бабарыка таксама датычны да справы, маўляў, «гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
- Фігурантамі «справы „Белгазпрамбанку“» сталі каля 20 чалавек.
- 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
- 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
- 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
- Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
- 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
- Штаб Бабарыкі падрыхтаваў да здачы 435 тысяч подпісаў.
- 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
- 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
- 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
- 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
- 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
- 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
- 12 ліпеня стала вядома, што Бабарыку этапавалі ў ПК №1 у г. Наваполацак.
- 12 кастрычніка з ізалятараў выйшлі некалькі чалавек, затрыманых у справе «Белгазпрамбанку». Ім зьмянілі меру стрыманьня, але іншыя падрабязнасьці справы невядомыя.
- У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.
Форум