Аб рашэнні суду сам арыштаваны беларус, прозьвішча якога не называецца зь меркаваньняў бясьпекі, распавёў па тэлефоне сваёй сяброўцы.
Пра гэта паведаміў «Позірку» беларускі праваабаронца Раман Кісьляк, які пражывае ў Грузіі.
Паводле яго слоў, у суд не ўдалося перадаць дакумэнты для абароны беларуса, у тым ліку даклад Камітэта ААН супраць катаваньняў і справаздачу спэцыяльнага дакладчыка ААН па Беларусі.
Беларуса затрымалі 14 ліпеня ў будынку Дэпартамэнта міграцыі, куды прыйшоў падаць заяву на атрыманьне прытулку.
Паводле Кісьляка, беларусу ў дэпартамэнце сказалі прыйсьці на наступны дзень, бо не пасьпяваюць прыняць ягоную заяву. Але калі пайшоў на выхад, яго затрымалі.
Як сьцьвярджае Кісьляк, затрыманы не выяжджаў з Грузіі больш за год, што забаронена міграцыйнымі правіламі. І ў яго быў пратэрмінаваны пашпарт, бо пасольствы Беларусі перасталі іх выдаваць з восені 2023 году.
Грузінскія ўлады апошнім часам адмаўляюць беларусам у прытулку. Кіроўная партыя «Грузінская мара» прарасейскага алігарха Бідзіны Іванішвілі пайшла на канфрантацыю з Захадам і прызнала рэжым Лукашэнкі. Прэзыдэнт Грузіі Міхаіл Кавелашвілі, выбары якога апазыцыя байкатавала, сёлета павіншаваў Лукашэнку зь пераабраньнем.
Сам Раман Кісьляк 11 ліпеня атрымаў канчатковую адмову ў прытулку, прайшоўшы за некалькі гадоў усе мясцовыя інстанцыі. Цягам 30 дзён ён абавязаны пакінуць Грузію. У яго таксама скончыўся тэрмін дзеяньня пашпарта. «У гэтай сытуацыі ў мяне адна дарога — у Беларусь», — сказаў ён «Позірку».
Кісьляк мае намер абскардзіць рашэньне мясцовых уладаў у ААН.
У Грузіі цяпер пражывае каля 12 тысяч беларусаў, якія эмігравалі з-за пагрозы рэпрэсій. Іх колькасьць паступова зьмяншаецца.
Паводле Нацыянальнага статыстычнага офісу, у Грузію з 2021 году прыехала каля 21 тысячы беларусаў, прычым больш за 13 тысяч — у 2022 годзе. З 2023 году колькасьць беларусаў, якія пакідаюць Грузію большая за тых, хто туды прыяжджае.
